ദുബായിലെ മെഹ്സൂസ് നറുക്കെടുപ്പിൽ മലയാളിയെ തേടിയാണ് ഇത്തവണ ഭാ​ഗ്യമെത്തിയത്. 88–ാമത് നറുക്കെടുപ്പിൽ വിജയം സ്വന്തമാക്കിയത് പ്രവാസിയായ തിരുവനന്തപുരം സ്വദേശി ഷാനവാസാണ്. 10 കോടി രൂപ (50 ലക്ഷം ദിർഹം) ആണ് ഇദ്ദേഹത്തിന് സമ്മാനം ലഭിച്ചിരിക്കുന്നത്. ഇദ്ദേഹത്തിനൊപ്പം ഫിലിപ്പീൻസ് സ്വദേശിയുമായി തുക തുല്യമായി പങ്കിടണം. 20 കോടി ആണ് മൊത്തം ലഭിച്ചത്. ഇത് രണ്ട് പേരും കൂടി തുല്യമായി പങ്കിട്ടണം.

3,349 വിജയികൾ ആണ് ഈ നറുക്കെടുപ്പിൽ മൊത്തം ഉണ്ടായത്. ഇതാദ്യമാണ് മെഹ്സൂലിൽ ഒന്നാം സ്ഥാനക്കാരായി രണ്ട് പേർ എത്തുന്നത്. ഷാനവാസ് 14 വർഷമായി യുഎഇയിൽ ഉണ്ട്. 12 വർഷമായി ദുബായ് അല്‍ ഖൂസിലെ സ്വദേശിയുടെ റെന്റ് എ കാർ കമ്പനിയിൽ മാനേജർ ആയി ആണ് ജോലി ചെയ്യുന്നത്. വിജയികൾ ആയ രണ്ട് പേരും നൽകിയ അഞ്ച് നമ്പറുകളും ഒരുപോലെ വന്നു. ഇതോടെയാണ് രണ്ട് പേർക്കും ഒന്നാം സമ്മാനം പങ്കിടാൻ സാധിച്ചത്. ഗൾഫിൽ 4.500 ദിർഹം പ്രതിമാസ ശമ്പളത്തിനാണ് ഷാനവാസ് ജോലി ചെയ്യുന്നത്.

മെഹ്സൂസ് നറുക്കെടുപ്പ് തുടങ്ങിയ കാലം മുതൽ തന്നെ ഷാനവാസ് എല്ലാ ആഴ്ചയും ഭാഗ്യം പരിശോധിക്കും. ഇത് രണ്ടാം തവണയാണ് ഇദ്ദേഹത്തെ തേടി ഭാഗ്യം എത്തുന്നത്. 35,000 ദിർഹം ആണ് അദ്യം ഇദ്ദേഹത്തെ തേടിയെത്തിയത്. എപ്പോഴും ഒറ്റക്കാണ് ഷാനവാസ് നറുക്കെടുക്കുന്നത്. ചിലപ്പോൾ രണ്ടെണ്ണം എടുക്കും. അഞ്ച് നമ്പറുകളോട് വലിയ ഇഷ്ടം ആണ് അതുകൊണ്ട് തന്നെ അദ്ദേഹം അതിനാണ് കൂടുതൽ പ്രാധാന്യം നൽക്കുന്നത്.

മെഹ്സൂസിൽ നിന്ന് ഫോൺ വന്നപ്പോൾ ആണ് തനിക്ക് സമ്മാനം ലഭിച്ച വിവരം ഷാനവാസ് അറിയുന്നത്. ആദ്യം അദ്ദേഹത്തിന് ഇത് വിശ്വസിക്കാൻ സാധിച്ചിരുന്നില്ല. നറുക്കെടുപ്പിൽ വിജയിച്ചെങ്കിലും ജോലിയിൽ തുടരാൻ തന്നെയാണ് ഷാനവാസിന്റെ തീരുമാനം. സമ്മാനം ലഭിച്ച തുക എന്ത് ചെയ്യണം എന്ന കാര്യത്തിൽ തീരുമാനത്തിൽ എത്തിയിട്ടില്ല. ആലോചിച്ച് വേണ്ട പോലെ കാര്യങ്ങൾ കെെകാര്യം ചെയ്യും. മെഹ്‌സൂസ് നറുക്കെടുപ്പിൽ ആകെ ഇതുവരെ സൃഷ്‌ടിച്ചത് 27 മൾട്ടി മില്യണയർമാരെയാണ്.