സൂപ്പര്‍സ്റ്റാര്‍ പൃഥ്വിരാജ് സംവിധാനം ചെയ്ത് മാര്‍ച്ച് 28-ന് പ്രദര്‍ശനത്തിന് എത്തുന്ന ലൂസിഫറിന്റെ വിശേഷങ്ങളുമായി പൃഥ്വിരാജ്, മോഹന്‍ലാല്‍, മഞ്ജു വാര്യര്‍, മുരളി ഗോപി, ടൊവിനോ തോമസ്, ആന്റണി പെരുമ്പാവൂര്‍ എന്നിവര്‍ അണിനിരന്ന വാര്‍ത്താ സമ്മേളനത്തിനിടയില്‍ പൃഥ്വിയെ തേടിയെത്തിയ ഒരു ചോദ്യവും അതിന് പൃഥ്വി നല്‍കിയ മറുപടിയും ആകെ ചിരി പടര്‍ത്തി.

രണ്ടാം ക്ലാസില്‍ പഠിക്കുമ്പോള്‍ പൃഥ്വിയുടെ കൈയില്‍ നിന്നും സമ്മാനം മേടിച്ച ആരാധികയാണ് ചോദ്യവുമായെത്തിയത്. ''ഞാന്‍ രണ്ടാം ക്ലാസില്‍ പഠിക്കുമ്പോള്‍ തിരുവനന്തപുരത്ത് കലാവേദിയുടെ പരിപാടിയില്‍ രാജുവേട്ടന്‍ അതിഥിയായി വന്നിരുന്നു. അന്ന് രാജുവേട്ടനാണ് ഒന്നാം സമ്മാനം എനിക്ക് തന്നത്. സമ്മാനം തന്നതിനു ശേഷം ആരാകാനാണ് ആഗ്രഹമെന്ന് രാജുവേട്ടന്‍ എന്നോട് ചോദിച്ചു. രാജുവേട്ടന്‍ ആ സമയത്ത് നക്ഷത്രക്കണ്ണുള്ള രാജകുമാരനില്‍ മാത്രമാണ് അഭിനയിച്ചത്. ആ സ്റ്റേജില്‍ വെച്ച് ഞാന്‍ പറഞ്ഞു, എനിക്ക് ലാലേട്ടന്റെ നായികയാകണമെന്ന്. ആ സമയം രാജുവേട്ടന്റെ മുഖം ഒന്നു ചുളിഞ്ഞിട്ടുണ്ടായിരുന്നു. ചെറുപ്പമായതു കൊണ്ട് അന്ന് രാജുവേട്ടന് എന്താണ് തോന്നിയതെന്ന് എനിക്ക് അറിയാന്‍ കഴിഞ്ഞിരുന്നില്ല.'' - ആരാധിക പൃഥ്വിരാജിനോട് പറഞ്ഞു.

പൃഥ്വി നല്‍കിയ മറുപടി രസിപ്പിയ്ക്കുന്നതായിരുന്നു. '' കുഞ്ഞുനാളില്‍ കുട്ടി, ലാലേട്ടന്റെ നായികയാകണമെന്നു പറഞ്ഞപ്പോള്‍ എന്റെ മുഖം ചുളിഞ്ഞിട്ടുണ്ടാകും. അന്ന് ഞാനത്ര അനുഭവസമ്പത്തുള്ള നടനല്ലാത്തതു കൊണ്ട് എന്റെ മുഖം ചുളിഞ്ഞത് മറച്ചുപിടിക്കാന്‍ പറ്റിയില്ല. ഇപ്പോള്‍, ഈ കഥ പറഞ്ഞപ്പോളും എന്റെ മുഖം ചുളിഞ്ഞു. പക്ഷേ ഞാനത് മറച്ചു പിടിച്ചു. കാരണം രണ്ടാം ക്ലാസില്‍വച്ച് ഞാന്‍ സമ്മാനം തന്നുവെന്ന് പറഞ്ഞപ്പോള്‍ എന്റെ പ്രായം....(പൃഥ്വി ചിരിക്കുന്നു). മറ്റൊരു സംഭവം കൂടി ഓര്‍ക്കുന്നു. അമര്‍ അക്ബര്‍ അന്തോണിയില്‍ നമിത പ്രമോദ് വന്നപ്പോള്‍, മൂന്നാം ക്ലാസ് മുതല്‍ ഞാന്‍ ചേട്ടന്റെ ഫാന്‍ ആണെന്ന് പറഞ്ഞിരുന്നു. അന്ന് എന്റെ മുഖം ചുളിഞ്ഞപ്പോഴും ഞാന്‍ മറച്ചു പിടിച്ചു. ഇന്നും അങ്ങനെ തന്നെ സംഭവിച്ചു.'' - പൃഥ്വി ചിരിച്ചു കൊണ്ട് പറഞ്ഞു.