മൂന്നു രാജ്യങ്ങളുമായി അതിര്‍ത്തി പങ്കിടുന്ന സിക്കിം സംസ്ഥാനം അയല്‍ക്കാരുടെയെല്ലാം സംസ്‌കാരികവൈവിധ്യം ഇരുകൈനീട്ടി സ്വീകരിച്ചിരിക്കുന്നു. സിക്കിമില്‍ ഈ വൈവിധ്യത്തില്‍നിന്നു പിറവിയെടുത്ത ഒരു നിയമസഭാ മണ്ഡലമുണ്ട്. ഭൂപടത്തിലില്ലാത്ത മണ്ഡലം! ആകെയുള്ള 31 നിയമസഭാ മണ്ഡലങ്ങള്‍ക്കു പുറമേ സംസ്ഥാനത്താകെ വ്യാപിച്ചുകിടക്കുന്ന 'സംഗ' എന്ന സാങ്കല്‍പിക മണ്ഡലത്തില്‍ മല്‍സരിക്കാനും വോട്ടുചെയ്യാനും അവകാശം ബുദ്ധസന്യാസികള്‍ക്കു മാത്രമാണ്. സംഗ എന്നുതന്നെ അറിയപ്പെടുന്ന മൊണാസ്റ്റിക് കമ്യൂണിറ്റിക്കുവേണ്ടി മാറ്റിവച്ചിരിക്കുന്ന രാജ്യത്തെ ഏക മണ്ഡലംകൂടിയാണിത്.

സിക്കിമിലെ ബുദ്ധമത പാരമ്പര്യത്തിനു നൂറ്റാണ്ടുകളുടെ പഴക്കമുണ്ട്. ടിബറ്റിനോടു ചേര്‍ന്നുകിടക്കുന്ന സംസ്ഥാനത്തേക്കു ബുദ്ധമതമെത്തിയത് ഒന്‍പതാം നൂറ്റാണ്ടില്‍. 13-ാം നൂറ്റാണ്ടുമുതല്‍ നാടുഭരിച്ച ചൊഗ്യാല്‍ രാജവംശത്തിലെ മന്ത്രിസഭകളിലെല്ലാം സാധാരണ ജനങ്ങളില്‍നിന്നും, ബുദ്ധസന്യാസികളായ ലാമമാരില്‍നിന്നും പ്രതിനിധികളുണ്ടായിരുന്നു.

രാജഭരണം അവസാനിപ്പിച്ച് സിക്കിം സ്വതന്ത്ര ഇന്ത്യയുടെ ഭാഗമായത് 1975-ലാണ്. ജനാധിപത്യ പ്രക്രിയയിലും മുന്‍പത്തേതുപോലെ ലാമമാരുടെ പ്രാതിനിധ്യം തുടരാന്‍ തീരുമാനിക്കുകയായിരുന്നു.

ലാമമാര്‍ ഒരു ബുദ്ധവിഹാരത്തില്‍ സ്ഥിരമായി താമസിക്കാറില്ല. ചെറിയ ഇടവേളകളില്‍ താമസസ്ഥലം മാറിക്കൊണ്ടിരിക്കുന്നതിനാല്‍ ഓരോ തവണയും പുതിയ മണ്ഡലത്തിലെ വോട്ടര്‍ പട്ടികയില്‍ രജിസ്റ്റര്‍ ചെയ്യേണ്ടിവരും. ഇതിലെ പ്രായോഗിക ബുദ്ധിമുട്ട് ഒഴിവാക്കുവാനാണ് ഇത്തരമൊരു സാങ്കല്‍പിക മണ്ഡലം. സംസ്ഥാനത്താകെ വ്യാപിച്ചിട്ടുള്ള എല്ലാ ബുദ്ധസന്യാസികളും സംഗ മണ്ഡലത്തിലെ വോട്ടറാണ്. തങ്ങളുടെ പ്രദേശത്തെ ബൂത്തില്‍ ഇവര്‍ക്കു വോട്ടുചെയ്യാം.

ലോക്‌സഭയ്‌ക്കൊപ്പം നിയമസഭയിലേക്കും ആദ്യഘട്ടത്തില്‍ വോട്ടെടുപ്പ് പൂര്‍ത്തിയായ സിക്കിമില്‍, എല്ലാ പോളിങ് സ്റ്റേഷനിലും മൂന്ന് വോട്ടിങ് യന്ത്രങ്ങള്‍ സജ്ജീകരിച്ചിരുന്നു. ഏക ലോക്‌സഭാ മണ്ഡലത്തിലേക്കും അതത് നിയമസഭാ മണ്ഡലത്തിലെ പ്രതിനിധിക്കും വോട്ടുചെയ്യാന്‍ ഓരോന്ന്. മൂന്നാമത്തേത്, അതതു പ്രദേശത്തെ ബുദ്ധ സന്യാസിമാര്‍ക്കു സംഗ സീറ്റിലേക്കു വോട്ട് ചെയ്യാനും.

വോട്ടെടുപ്പ് ദിനമായ ഏപ്രില്‍ 11-ന് എല്ലാ ബുദ്ധവിഹാരങ്ങളിലും പ്രതിദിന ആരാധനകളും ചടങ്ങുകളും ഒഴിവാക്കിയിരുന്നു.

സ്ഥിരമായി ഒരു രാഷ്ട്രീയ പാര്‍ട്ടിക്കും ഒപ്പം നില്‍ക്കാത്ത മണ്ഡലമാണു സംഗ. 2014-ല്‍ സിക്കിം ക്രാന്തികാരി മോര്‍ച്ചയുടെ സോനം ലാമയാണ് ഇവിടെ വിജയിച്ചത്. അദ്ദേഹം 1096 വോട്ട് നേടിയപ്പോള്‍ എസ്ഡിഎഫിന്റെ പാല്‍ഡെന്‍ ലചുങ്പ 971 വോട്ടുമായി രണ്ടാമതെത്തി. 2009-ല്‍ എസ്ഡിഎഫും 2004-ല്‍ കോണ്‍ഗ്രസും 1999-ല്‍ സ്വതന്ത്ര സ്ഥാനാര്‍ഥിയും ജയിച്ചു.