അധികൃതരെ കബളിപ്പിച്ച് അമിതഭാരമുള്ള പൂച്ചയെ വിമാനത്തിനുള്ളില്‍ എത്തിച്ചു, പക്ഷേ വിമാനത്തില്‍ വച്ച് പൂച്ചയ്‌ക്കൊപ്പം ഫോട്ടോ എടുത്ത് പോസ്റ്റ് ചെയ്തതോടെ കുടുങ്ങി!
ലാത്വിയയില്‍ നിന്ന് മോസ്‌കോ വഴി കിഴക്കന്‍ റഷ്യയിലെ വ്‌ലാഡിവോസ്‌റ്റോക് എന്ന സ്ഥലത്തേക്ക് തന്റെ വളര്‍ത്തുപൂച്ചയേയുംകൊണ്ട് യാത്ര ചെയ്യാനെത്തിയ മിഖായേല്‍ ഗാലിന്‍ എന്ന 34-കാരനോട് എട്ടുകിലോ മാത്രം ഭാരമുള്ള വളര്‍ത്തുമൃഗങ്ങളെ മാത്രമേ അകത്ത് കടത്താനാവൂ എന്നാണ് തങ്ങളുടെ എയര്‍ലൈന്‍സിന്റെ നിയമം എന്നവരറിയിച്ചു. മിഖായേലിന്റെ ഓമനപൂച്ചയുടെ ഭാരമാകട്ടെ 10 കിലോയും. അതിനെ കാര്‍ഗോയുടെ ഒപ്പം അയയ്ക്കാനേ സാധിക്കൂ എന്നറിഞ്ഞതോടെ അയാള്‍ അന്നത്തെ യാത്ര പിറ്റേന്നത്തേയ്ക്ക് മാറ്റിവച്ചിട്ട് മടങ്ങി.
അടുത്ത ദിവസം മടങ്ങിയെത്തിയ അയാള്‍ തന്റെ വളര്‍ത്തുപൂച്ചയ്ക്കു സമാനമായ ഭാരം കുറഞ്ഞ മറ്റൊരു പൂച്ചയെ സുഹൃത്തിന്റെ പക്കല്‍ നിന്നും സംഘടിപ്പിച്ചാണ് വിമാനത്താവളത്തിലെത്തിയത്. ആ പൂച്ചയെ കാണിച്ച് ഇയാള്‍ ചെക്ക് ഇന്‍ സമയത്തെ പരിശോധന മറികടന്നു.
അമിതഭാരമുള്ള വളര്‍ത്തുപൂച്ചയെ വിമാനത്താവള അധികാരികളെ പറ്റിച്ച് വിമാനത്തില്‍ കയറ്റി. എന്നാല്‍ വിമാനത്തിലിരുന്ന് പുച്ചയ്‌ക്കൊപ്പം സെല്‍ഫിയെടുത്ത് പോസ്റ്റ് ചെയ്തതോടെ കുടുങ്ങി. മോസ്‌കോയിലാണ് സംഭവം.
ചെക്ക് ഇന്‍ ചെയ്ത് കഴിഞ്ഞപ്പോള്‍ വലിപ്പം കുറഞ്ഞ പൂച്ചയെ ഉടമയ്ക്ക് തിരികെ നല്‍കിയ ശേഷം തന്റെ പൂച്ചയെ കൂട്ടില്‍ക്കയറ്റി. എന്നാല്‍ വിമാനത്തിനുള്ളില്‍ എത്തിയ ഇയാള്‍ പൂച്ചയ്‌ക്കൊപ്പമുള്ള സെല്‍ഫിയെടുത്ത് സമൂഹമാധ്യമത്തില്‍ പോസ്റ്റ് ചെയ്തതോടെയാണ് കള്ളം പൊളിഞ്ഞത്.
മിഖായേല്‍ , എയര്‍ലൈനിന്റെ ഫ്രീക്വന്റ് ഫ്‌ളൈയര്‍ മൈല്‍ പ്രോഗ്രാമില്‍ ഉള്‍പ്പെട്ട യാത്രക്കാരനായതിനാല്‍ ഇതുവരെ നടത്തിയ യാത്രകളില്‍ നിന്നും ആര്‍ജ്ജിച്ച 400.000 ഫ്‌ളൈയര്‍ മൈല്‍ അസാധുവാക്കുകയാണെന്നും ഇനി മുതല്‍ തങ്ങളുടെ സേവനം ലഭ്യമാകില്ലെന്നും അധികൃതര്‍ വ്യക്തമാക്കി. എന്നാല്‍ ശിക്ഷയില്‍ ദുഖമില്ലെന്നും വളര്‍ത്തുമൃഗങ്ങളുടെ ഭാരം കുറയ്ക്കണമെന്ന നിയമം പരിഹാസ്യമാണെന്നും മിഖായേല്‍ പറഞ്ഞു.
https://www.facebook.com/Malayalivartha
