ചാലിയാര്‍ നദിയും കോഴിക്കോട് ബേപോര്‍ ബീച്ചും ചേരുന്നിടത്ത് ഒരു സെമിത്തേരി ഉണ്ട്. പ്ലാസ്റ്റിക് മലിനീകരണം കാരണം വംശനാശം സംഭവിക്കുന്ന സമുദ്ര ജീവികള്‍ക്കായി സമര്‍പ്പിച്ചിരിക്കുന്ന ശ്മശാനം ആണിത്. ലോക വന്യജീവി സംരക്ഷണ ദിനമായ ഡിസംബര്‍ നാലിനാണ് കോഴിക്കോട് ഇത് സ്ഥാപിച്ചത്.

പ്ലാസ്റ്റിക് മലിനീകരണത്തിന്റെ ഫലങ്ങളെക്കുറിച്ച് അവബോധം സൃഷ്ടിക്കുന്നതിനാണ് ജെല്ലിഫിഷ് വാട്ടര്‍സ്‌പോര്‍ട്‌സ് എന്ന കമ്പനി, കാലാവസ്ഥാ പ്രവര്‍ത്തകനായ ആകാശ് റാനിസണുമായി ചേര്‍ന്ന് ഇത് നിര്‍മ്മിച്ചത്. 'ഈ ഇന്‍സ്റ്റലേഷനുകള്‍ ഉണ്ടാക്കാന്‍ ഞങ്ങള്‍ക്ക് ഏകദേശം 25 ദിവസമെടുത്തു. അവയില്‍ എട്ട് എണ്ണം നാല് അടി ഉയരവും മധ്യഭാഗത്തുള്ളതിന് ആറടി ഉയരവുമുണ്ട്. ഏറ്റവും ഉയരമുള്ളത് മിസ് കേരള എന്നറിയപ്പെടുന്ന ഡെനിസണ്‍ ബാര്‍ബ് എന്ന മത്സ്യത്തിനായി സമര്‍പ്പിച്ചിട്ടുള്ളതാണ്, ആകാശ് റാണിസണ്‍ പറഞ്ഞു.

സെമിത്തേരിയില്‍ ഇരുമ്പ് ചട്ടക്കൂടിനാല്‍ നിര്‍മ്മിച്ച ശവകുടീരത്തോടുകൂടിയ ഒമ്പത് ശവക്കല്ലറകള്‍ ഉണ്ട്. അതിനടുത്തുള്ള പ്ലാസ്റ്റിക് ഫലകത്തില്‍ ഉടന്‍ തന്നെ വംശനാശം സംഭവിക്കുന്ന അല്ലെങ്കില്‍ ഗുരുതരമായി വംശനാശഭീഷണി നേരിടുന്ന ജലജീവികളുടെ പേരുകളുമുണ്ട്. എല്ലാ 4 x 3 അടി ശവക്കല്ലറകളും പുനരുപയോഗം ചെയ്യാനാകാത്ത പ്ലാസ്റ്റിക് കുപ്പികള്‍ കൊണ്ടാണ് നിര്‍മ്മിച്ചിരിക്കുന്നത്.

ഇരുന്നൂറോളം സന്നദ്ധ പ്രവര്‍ത്തകരാണ്, ഉയരമുള്ള ശവകുടീരം പണിയാന്‍ ആവശ്യമായ പ്ലാസ്റ്റിക് ശേഖരിക്കാന്‍ ചാലിയാര്‍ നദിയില്‍ നിന്ന് മാലിന്യം എടുത്തത്. ഇതിനായി നവംബറില്‍ ബേപ്പൂരില്‍ ബീച്ച് ക്ലീന്‍ അപ്പ് ഡ്രൈവ് ആരംഭിച്ചു. 800 കിലോ മാലിന്യം ശേഖരിച്ചത്തില്‍ 2,000 -ത്തോളം പ്ലാസ്റ്റിക് കുപ്പികളുണ്ടായിരുന്നു. ക്ലീന്‍ ബീച്ച് മിഷന്റെ തലവനായ കോഴിക്കോട് കളക്ടര്‍ സംബാശിവ റാവു, എംഎല്‍എ വി.കെ.സി മുഹമ്മദ് കോയ എന്നിവരുടെ പിന്തുണയോടെയാണ് ബീച്ച് ക്ലീന്‍ അപ്പ് ഡ്രൈവ് നടന്നത്.

സെമിത്തേരി ഉണ്ടാക്കിയത് കൂടാതെ, മാലിന്യങ്ങള്‍ ഉപേക്ഷിക്കുന്നതിനെക്കുറിച്ചും വെള്ളം പ്ലാസ്റ്റിക്ക് രഹിതമായി സൂക്ഷിക്കുന്നതിനെക്കുറിച്ചും ജനങ്ങളെ ബോധവാന്മാരാക്കുന്നതിലും ജെല്ലിഫിഷ് കമ്പനി തങ്ങളുടേതായ പങ്കുവഹിക്കുന്നുണ്ട്.