ബെല്‍ജിയം പൗരയായ കിരണ്‍ വാന്‍ സെര്‍വര്‍ട്ടിന്റെ അമ്മ കേരളത്തിലെവിടെയോ ഉണ്ട്. സന്നദ്ധ സംഘടനയുടെ സഹായത്തോടെ ദിവസങ്ങളായി അവര്‍ അന്വേഷണം നടത്തുന്നു. എന്നാല്‍ 11 മാസം പ്രായമുള്ളപ്പോള്‍ അമ്മയെ പിരിഞ്ഞ കിരണിന്റെ ഓര്‍മയില്‍ അമ്മയുടെ മുഖമില്ല; എന്നോ നുണഞ്ഞ അമ്മിഞ്ഞപ്പാലിന്റെ മധുരമേയുള്ളു. മുഖം പോലും ഓര്‍മയില്ലാതെ, ബന്ധുക്കളെക്കുറിച്ചു വിവരമില്ലാതെ, 35 -ാം വയസ്സില്‍ അമ്മയെ എങ്ങനെ കണ്ടെത്തുമെന്ന ചോദ്യം മാത്രം ബാക്കി. എങ്കിലും കിരണ്‍ പ്രതീക്ഷ കൈവിടുന്നില്ല.

16 വയസുള്ള ഏതോ ഒരു പെണ്‍കുട്ടിയുടെ മകളായി കറുകുറ്റി പാദുവാപുരത്തുള്ള സിസ്റ്റേഴ്‌സ് ഓഫ് നസ്‌റേത്ത് ശിശുഭവനിലായിരുന്നു 1984 ഓഗസ്റ്റ് 15-ന് ആയിരുന്നു കിരണിന്റെ ജനനം. കുഞ്ഞിനെ ശിശുഭവനില്‍ ഏല്‍പിച്ച് അമ്മ മടങ്ങി. മാഗി മാര്‍ഗരറ്റെന്ന പേരില്‍ അവള്‍ വളര്‍ന്നു. 1985 ജൂലൈയില്‍ ശിശുഭവന്‍ സന്ദര്‍ശിച്ച ബെല്‍ജിയത്തില്‍നിന്നുള്ള ലൂക്കും ലീവും മാഗിയെ ദത്തെടുത്തു. മാഗിയെന്ന പേരുമാറ്റി കിരണ്‍ എന്നപേരില്‍ വളര്‍ത്തി. ബെല്‍ജിയത്തിലെ വീട്ടില്‍ 1980-ല്‍ കൊല്‍ക്കൊത്തയില്‍നിന്നു ദത്തെടുത്ത ജ്യൂവല്‍, കിരണിനു സഹോദരനായി ഉണ്ടായിരുന്നു. 1993-ല്‍ ജാസ്പര്‍ എന്ന കുഞ്ഞനുജനും കൂടി ആ വീട്ടിലെത്തി. കിരണിനു പെറ്റമ്മയെക്കുറിച്ചുള്ളത് വളര്‍ത്തമ്മ പറഞ്ഞ വിവരങ്ങള്‍ മാത്രമാണ്.

ക്രിസ്മസ് കാലത്ത് കിരണിനെ തേടി ബെല്‍ജിയത്തിലെ വീട്ടിലെത്തിയിരുന്ന ശിശുഭവനിലെ ആശംസാ കാര്‍ഡുകള്‍ അവളെ അമ്മയെക്കുറിച്ച് ഓര്‍മിപ്പിച്ചു. ഇപ്പോള്‍ 2 മക്കളുടെ അമ്മയായ കിരണ്‍ ബെല്‍ജിയത്തില്‍ ഒരു ബ്രോഡ്കാസ്റ്റിങ് കമ്പനിയില്‍ സ്‌ക്രിപ്ട് റൈറ്ററാണ്. അമ്മയായതോടെ സ്വന്തം അമ്മയെക്കണ്ടെത്താനുള്ള ആഗ്രഹം ശക്തമായി. ഈ വര്‍ഷം ജൂണില്‍ വളര്‍ത്തമ്മയ്ക്കും സഹോദരനുമൊപ്പം, കിരണ്‍ അമ്മയെത്തേടി കേരളത്തിലെത്തിയിരുന്നു. കുറേ അന്വേഷിച്ചെങ്കിലും വിവരങ്ങളൊന്നും ലഭിക്കാതെ തിരികെപ്പോയി.

ബെല്‍ജിയത്തിലെ സന്നദ്ധ സംഘടനയായ സ്റ്റോണ്‍ പില്ലറ്റിന്റെ സഹായത്തോടെയാണ് ഇക്കുറി വരവ്. 10 മാസം തന്നെ കാത്തിരുന്ന അമ്മ സന്തോഷത്തോടെയാവുമോ അക്കാലം ചെലവിട്ടതെന്നു കിരണിനറിയില്ല. എന്നാലും വര്‍ഷങ്ങളായി പ്രതീക്ഷയോടെ കാത്തിരിക്കുകയാണ് കിരണ്‍.