പശ്ചിമബംഗാളിലെ ഝാര്‍ഗ്രാം എന്ന സ്ഥലത്തു നിന്നും പുറത്ത് വന്ന വിഡിയോ സോഷ്യല്‍ മീഡിയയെ ഞെട്ടിക്കുകയാണ്. കാടുകയറാനൊരുങ്ങുന്ന ഒരു ആനയുടെ വാലില്‍ പിടിച്ച് വലിയ്ക്കുന്ന ഒരാളുടെ വിഡിയോയാണ് പുറത്തുവന്നിരിക്കുന്നത്. ഇവിടെ ആനകളും മനുഷ്യരും തമ്മിലുള്ള സംഘട്ടനങ്ങള്‍ കഴിഞ്ഞ കുറേ മാസങ്ങളായി കൂടുതലാണെന്നാണ് റിപ്പോര്‍ട്ട്.

ആനയെ ഉപദ്രവിക്കാന്‍ ശ്രമിക്കുന്ന ആളുടെ വിഡിയോ പുറത്ത് വിട്ടത് ആനയെ ഗ്രാമത്തില്‍ നിന്ന് തുരത്തിയ ആളുകള്‍ തന്നെയാണ്. മനുഷ്യരെ കണ്ട് ഭയന്ന് കാടുകയറാനൊരുങ്ങിയ കാട്ടാനയുടെ വാലില്‍ പിടിച്ചു വലിക്കുകയായിരുന്നു ഇയാള്‍. ഇയാള്‍ അത്രയധികം അലോസരപ്പെടുത്തിയിട്ടും ആന തിരിച്ച് ഉപദ്രവിക്കാതെ മുന്നോട്ട് ഓടുന്നതായാണ് വിഡിയോയില്‍ കാണുന്നത്.

ഇയാള്‍ ആനയെ ഭയപ്പെടുത്തുന്നത് തടയുന്നതിന് പകരം ഇയാളുടെ ചുറ്റുമുള്ള ആളുകള്‍ പ്രോത്സാഹിപ്പിക്കുകയാണ് ചെയ്യുന്നത്. വടിയും മറ്റ് ആയുധങ്ങളുമായി ആനയുടെ മുന്നിലെത്തുവരെയും വിഡിയോയില്‍ കാണാം.

വനംവകുപ്പ് ഉദ്യോഗസ്ഥര്‍ സംഭവത്തില്‍ ഉള്‍പ്പെട്ടവരെക്കുറിച്ച് അന്വേഷണമാരംഭിച്ചു. അതേസയമം ഗ്രാമവാസിയുടെ ഈ പ്രവൃത്തിയ്ക്കെതിരെ കടുത്ത വിമര്‍ശനമാണ് സോഷ്യല്‍ മീഡിയയില്‍ ഉയരുന്നത്.