അയിരൂര്‍ പഞ്ചായത്തിലെ ഇടപ്പാവൂരില്‍ കോവിഡ് സ്ഥിരീകരിച്ച വീട്ടിലെ അപ്പു എന്ന ഒന്നരവയസ്സുള്ള നായയെ മൃഗസംരക്ഷണ വകുപ്പ് 'സ്‌പെഷല്‍' നിരീക്ഷണത്തിലാക്കി.

പത്തനംതിട്ട ജില്ലയില്‍ ആദ്യമായാണ് ഒരു നായ കോവിഡ് 19-ന്റെ പശ്ചാത്തലത്തില്‍ നിരീക്ഷണത്തില്‍ കഴിയുന്നത്. വീട്ടിലെ പ്രത്യേക മുറിയിലാണ് കഴിയുന്നത്. ശ്വാസം മുട്ടല്‍, പനി, മൂക്കൊലിപ്പ് എന്നിവ ഉണ്ടാകുന്നുണ്ടോ എന്ന് ദിവസവും എത്തി പരിശോധിക്കുന്നുണ്ടെന്ന് ഉദ്യോഗസ്ഥര്‍ പറഞ്ഞു.

മാര്‍ച്ച് 22-ന് ഗള്‍ഫില്‍ നിന്ന് നാട്ടില്‍ എത്തി ക്വാറന്റീനില്‍ കഴിഞ്ഞ യുവാവിന് 18 ദിവസത്തിനു ശേഷം ഇക്കഴിഞ്ഞ 8-ന് കോവിഡ് സ്ഥിരീകരിച്ചതോടെ വീട്ടിലെ വളര്‍ത്തുനായയും 'നോട്ടപ്പുള്ളി'യാകുകയായിരുന്നു. അമേരിക്കയില്‍ മൃഗത്തിന് കോവിഡ് പോസിറ്റീവ് ആയതോടെയാണ് മറ്റു രാജ്യങ്ങളിലും പക്ഷിമൃഗാദികളും നിരീക്ഷണ വലയത്തിലായി തുടങ്ങിയത്.