ലോക്ഡൗണ്‍ ലംഘകരെ കണ്ടെത്താന്‍ ഡ്രോണുമായി ഇറങ്ങിയ പൊലീസിന്റെ തിരച്ചിലില്‍ ചിരുയുണര്‍ത്തുന്ന ദൃശ്യങ്ങളും വന്നുപെടുന്നുണ്ട്.

കഴിഞ്ഞ ദിവസം തമിഴ്‌നാട് തിരുവെള്ളൂരില്‍ അത്തരമൊരു സംഭവമുണ്ടായി.

ഒരു മാസം വീട്ടിലിരുന്നു മടുത്തതോടെ നേരിട്ടുകാണാന്‍ തീരുമാനിച്ച തിരുവെള്ളൂര്‍ കുമഡിപൂണ്ടിയിലെ കമിതാക്കളുടെ ദൃശ്യങ്ങള്‍ പോലീസിന്റെ ഡ്രോണില്‍ പെട്ടു.

കായല്‍ തീരത്തോടു ചേര്‍ന്നുള്ള തോട്ടത്തിലെ യുക്കാലി മരത്തിനു ചുവട്ടിലിരുന്നു വിരഹവേദനകള്‍ പങ്കുവയ്ക്കുന്നതിനിടെയാണു ഡ്രോണ്‍ കട്ടുറുമ്പായി എത്തിയത്.

തലയ്ക്കു മുകളില്‍ പൊലീസിന്റെ ഡ്രോണ്‍ കണ്ടതോടെ മുഖം മറച്ചുകൊണ്ട് കമിതാക്കള്‍ പാഞ്ഞു.

തമിഴിലെ സൂപ്പര്‍ ഹിറ്റ് സിനിമാ ഡയലോഗുകള്‍ ചേര്‍ത്ത് എഡിറ്റ് ചെയ്തു മനോഹരമാക്കിയ ദൃശ്യങ്ങള്‍ കാണുന്നവരൊക്കെ പറയുന്നത് ഒറ്റകാര്യമാണ്. ഇങ്ങിനെയൊക്കെ ചെയ്യാവോ പൊലീസേ എന്ന്.