കോട്ടയം ജില്ലയിലെ അയ്മനം പഞ്ചായത്തിലെ മൂന്നാം വാര്‍ഡായ കല്ലൂങ്കത്രയിലുള്ളവര്‍ ഇന്നലെ ഒരു കാര്യവുമില്ലാതെ പകല്‍ മുഴുവന്‍ വീട്ടില്‍ ഇരിക്കേണ്ടി വന്നു! കഴിഞ്ഞ ദിവസം പുറത്തിറക്കിയ പട്ടികയില്‍ അയ്മനം പഞ്ചായത്തിലെ കണ്ടെയ്ന്‍മെന്റ് സോണായി വാര്‍ഡ് 3 എന്ന് രേഖപ്പെടുത്തിയതാണ് പ്രശ്‌നമായത്.

ഉറക്കമുണര്‍ന്നവര്‍ കാര്യം തിരക്കിവന്നപ്പോഴാണ് സര്‍ക്കാരും കുഴപ്പക്കാരനായ 'ഒന്നിനെ' കണ്ടെത്തിയത്. കണ്ടെയ്ന്‍മെന്റ് സോണായി സര്‍ക്കാര്‍ ഉത്തരവില്‍ 13-ാം വാര്‍ഡായ പാണ്ഡവത്തിനു പകരം 3-ാം വാര്‍ഡായ കല്ലൂങ്കത്ര ഉള്‍പ്പെടുത്തിയതാണു കാരണം. കലക്ടറേറ്റിലും ഉദ്യോഗസ്ഥരെ ബന്ധപ്പെട്ടതോടെ ഇന്നലെ വൈകിട്ടോടെ തിരുത്തി ഉത്തരവിറങ്ങി.

2 ആഴ്ചയായി കോവിഡ് കേസുകള്‍ ഇല്ലാതിരുന്ന പായിപ്പാട്, വെള്ളാവൂര്‍ പഞ്ചായത്തുകള്‍ പുതിയ പട്ടികയില്‍ വീണ്ടും ഉള്‍പ്പെട്ടതും ആശയക്കുഴപ്പത്തിനിടയാക്കി.

അവസാനമായി പോസിറ്റീവ് കേസ് റിപ്പോര്‍ട്ട് ചെയ്ത ശേഷം 14 ദിവസം പൂര്‍ത്തിയാകുമ്പോള്‍ പ്രദേശത്തെ കണ്ടെയ്ന്‍മെന്റ് സോണില്‍ നിന്ന് ഒഴിവാക്കുമെന്ന് ആരോഗ്യ കേരളം ജില്ലാ പ്രൊജക്ട് മാനേജര്‍ ഡോ.വ്യാസ് സുകുമാരന്‍ പറഞ്ഞു.

ഈ മാനദണ്ഡങ്ങളുടെ അടിസ്ഥാനത്തില്‍ പായിപ്പാട്, വെള്ളാവൂര്‍ പഞ്ചായത്തുകളെ പട്ടികയില്‍ നിന്ന് ഒഴിവാക്കാന്‍ ആവശ്യപ്പെട്ടിട്ടുണ്ടെന്നും കണ്ടെയ്ന്‍മെന്റ് സോണുകള്‍ നിര്‍ണയിക്കുന്നതു സംബന്ധിച്ച് പുതുക്കിയ നിര്‍ദേശം വന്നിട്ടുണ്ടെന്നും അദ്ദേഹം പറഞ്ഞു. കോട്ടയം ജില്ലയില്‍ നിലവില്‍ 4 പഞ്ചായത്തുകളിലും ചങ്ങനാശേരി നഗരസഭയിലുമായി 8 വാര്‍ഡുകളാണ് കണ്ടെയ്ന്‍മെന്റ് സോണില്‍ ഉള്ളത്.