ബ്രസീലിലെ ക്യാമ്പോ ഗ്രാന്‍ഡെയിലുള്ള മാന്‍ഡോ ഗ്രോസ്സോ ഡോസള്‍ എന്ന സ്ഥലത്തു നിന്നു പകര്‍ത്തിയ അനാക്കോണ്ടയുടെ ദൃശ്യങ്ങള്‍ കൗതുകമുയര്‍ത്തുന്നു.

ഇവിടെയുള്ള ജീവനക്കാരന്‍ ഫാമിലേക്ക് പോകുന്നതിനിടെ വഴിയരികില്‍ വിശ്രമിക്കുന്ന നിലയില്‍ ഒരു അനാക്കോണ്ടയെ കണ്ടു. അപൂര്‍വ കാഴ്ചയായതിനാല്‍ തന്നെ ഇത് കാണാനായി അയാള്‍ തന്റെ കുടുംബത്തെയും സംഭവസ്ഥലത്തേക്ക് വിളിച്ചുവരുത്തി.

അനാക്കോണ്ടയുടെ ദൃശ്യങ്ങള്‍ പകര്‍ത്താനായി കാറിലെത്തിയ കുടുംബം വളരെ പതിയെ അതിന്റെ സമീപത്തു കൂടി പോയപ്പോള്‍ പാമ്പ് അക്രമാസക്തനാകുകയായിരുന്നു. കാറിനു നേരെ ചീറിയടുക്കുന്ന അനാക്കോണ്ടയെ ദൃശ്യത്തില്‍ കാണാം. പാമ്പ് കാറിനു നേരെ ചീറിയടുക്കുന്നത് കണ്ട് ഇവര്‍ വാഹനം പിന്നോട്ടെടുത്തു.

മുന്നോട്ടെടുത്ത മറ്റൊരു വാഹനത്തിനു നേരെയും പാമ്പു ചീറിയടുത്തു. വഴിയരികിലെ അനാക്കോണ്ട റൗഡികളുടെ സ്വഭാവമെടുത്തു എന്നാണ് സംഭവത്തെക്കുറിച്ച് അവിടെയുണ്ടായിരുന്നവര്‍ പ്രതികരിച്ചത്.