പകുതി ഭാഗം വരെ മാത്രം വെള്ളമുള്ള ഒരു ടംബ്ലര്‍ കണ്ടാല്‍ എന്ത് അഭിപ്രായമായിരിക്കും നിങ്ങള്‍ പറയുന്നത്? പകുതി നിറഞ്ഞ ഗ്ലാസ്സെന്നോ അതോ പകുതി ഒഴിഞ്ഞ ഗ്ലാസ്സെന്നോ? അത് കാണുന്ന വ്യക്തിയുടെ കാഴ്ചപ്പാടിനനുസരിച്ച് വ്യത്യാസപ്പെട്ടിരിക്കും.

ദോഷൈകദൃക്കുകള്‍ മറ്റുള്ളവരിലെ കുറവുകള്‍ എന്തൊക്കെയാണെന്നു കണ്ടെത്താന്‍ എപ്പോഴും മിനക്കെട്ടുകൊണ്ടിരിക്കും. അത്തരക്കാര്‍ എന്തിലും ഏതിലും കുറവുകളേ കാണൂ. എന്നാല്‍ മറ്റു ചിലരുണ്ട്. ഏത് പ്രതികൂലസാഹചര്യത്തിലും അതിന്റെ ഒരു നന്മയുടെ വശം കണ്ടെത്താന്‍ ശ്രമിക്കും. ഇതു തന്നെയാണ് മുകളില്‍ പറഞ്ഞ ടംബ്ലറിന്റെ കാര്യത്തിലും നടക്കുന്നത്. അതിനുള്ളിലുള്ള വെള്ളത്തെ കാണാതെ അതിലെ ഒഴിഞ്ഞഭാഗം മാത്രം കാണുന്ന ദോഷൈകദൃക്കുകളെപ്പോലെയുള്ളവരാണ് നമ്മിലധികം പേരും. ഇതാ അതിനു സമാനമായ ഒരു സാഹചര്യം.

ഒരു യാത്രയ്ക്കിടെ ഉറങ്ങിപ്പോയ യുവതിയുടെ കൈയ്യിലുണ്ടായിരുന്ന പിസ താഴെ വീണുപോയതിന്റെ ചിത്രങ്ങള്‍ നെറ്റില്‍ വൈറലായി. ഒരുപാട് രാത്രിയാകുമ്പോള്‍ എവിടെയിരുന്നാലും ബോധമില്ലാതെ ഉറങ്ങുന്നവരെ പലപ്പോഴും നമ്മള്‍ കളിയാക്കാറുണ്ട്. എന്നാല്‍ കൈയ്യിലെ പിസ താഴെ വീണു പോയത് പോലും അറിയാതെ ആ പെണ്‍കുട്ടി ഉറങ്ങിയത് രാവിലെ എട്ട് മണിക്ക് ആയിരുന്നു എന്നതിനാലാണ് സോഷ്യല്‍ മീഡിയയില്‍ ആ ചിത്രം വൈറലായത്.  

പെണ്‍കുട്ടിയുടെ ചിത്രത്തിന് 49,000ത്തോളം ഷെയറും 18,000ത്തോളം ലൈക്കും ലഭിച്ചു. അത്രയും നല്ല പിസ നശിപ്പിച്ചു കളഞ്ഞു എന്നാണ് പലരും ഈ ചിത്രത്തോട് പ്രതികരിച്ചത്. നിരവധി കമന്റുകളാണ് ചിത്രത്തിന് ലഭിച്ചത്. എന്തായിരുന്നിരിക്കും ആ യുവതിയുടെ സാഹചര്യമെന്ന് ആരും ചിന്തിച്ചിട്ടുണ്ടാവില്ല. നൈറ്റ് ഷിഫ്റ്റ് കഴിഞ്ഞു മടങ്ങുകയായിരുന്നിരിക്കാം ഒരുപക്ഷേ ആ യുവതി. അതാവും രാവിലെ എട്ടുമണിക്ക് ഇങ്ങനെ സ്ഥലകാലബോധമില്ലാതെ ഉറങ്ങിപ്പോയത്. ഏന്തായാലും പകലായാലും രാത്രി ആയാലും സ്ത്രീകള്‍ യാത്രയ്ക്കിടെ ശ്രദ്ധാലുക്കളായിരിക്കുന്നതാണ് നല്ലത്!