അമേരിക്കയിലെ കൊളറാഡോ സംസ്ഥാനത്തുള്ള ഡെന്‍വര്‍ പട്ടണത്തിലെ ഒരു പ്രസിദ്ധ ഷോപ്പാണ് സ്റ്റേപ്പിള്‍ടണിലുള്ള ബാസ് പ്രോ ഷോപ്പ്. ഇന്നലെ അവിടെയെത്തിയ ഒരു യുവാവ് കടയില്‍ വെച്ചിരുന്ന കൂറ്റന്‍ ഫിഷ് ടാങ്കിലേയ്ക്ക് എടുത്തു ചാടി. 30 അടി ഉയരത്തില്‍ നിന്നായിരുന്നു ചാടിയത്.

അടുത്തിടെയായി ഇപ്രകാരമുള്ള അക്വേറിയങ്ങളിലേയ്ക്ക് യുവാക്കള്‍ എടുത്തുചാടുന്ന പ്രാങ്ക് വീഡിയോകള്‍ ധാരാളമായി പ്രചരിക്കുന്നുണ്ടായിരുന്നു. അതിനെ അനുകരിച്ചാണ് യുവാവ് ഇത്തരത്തില്‍ ചെയ്തത്. ചാട്ടത്തിനിടയില്‍ തലയിടിച്ച് യുവാവ് ആശുപത്രിയിലുമായി. യുവാവിന്റെ പേര് പുറത്ത് വിട്ടിട്ടില്ല.

യുവാവ് ചാടുന്ന വീഡിയോ എടുക്കാന്‍ സുഹൃത്തുക്കളെ ഏല്‍പ്പിച്ചിരുന്നു. യുവാവിന്റെ ഇപ്പോഴത്തെ അവസ്ഥയെക്കുറിച്ചും വ്യക്തമല്ല. ചാടിയ യുവാവിനെതിരെ പിഴ ചുമത്തിയിട്ടുണ്ട്. ഇതിന് മുന്‍പും യുവാവ് ചാടാന്‍ ശ്രമിച്ചിരുന്നുവെന്നാണ് റിപ്പോര്‍ട്ട്. സംഭവത്തിന്റെ വീഡിയോ യൂട്യൂബില്‍ പോസ്റ്റ് ചെയ്തിട്ടുണ്ട്.