അപ്രതീക്ഷിതമായി, പരിചിതമല്ലാത്തതെന്തെങ്കിലും മുന്നില്‍പെട്ടാല്‍ ഒന്നു ഞെട്ടുന്നത് അത്ര വലിയ കുറ്റമൊന്നുമല്ല. പറഞ്ഞു വരുന്നത് ബ്രിട്ടനിലെ ബ്രോക്‌സ്‌ബോണിലുള്ള പാരഡൈസ് വന്യജീവി പാര്‍ക്കിലെ സിംഹത്തിനു പറ്റിയ അമളിയെക്കുറിച്ചാണ്. തന്റെ ഗൗരവത്തിനും വലിപ്പത്തിനും ഒന്നും ചേരാത്ത വിധമായിപ്പോയി ഒരു സോപ്പു കുമിള കണ്ടപ്പോഴുള്ള സിംഹരാജന്റെ ഞെട്ടല്‍.

കൂട്ടിനകത്ത് സവാരി നടത്തുന്നതിനിടെയിലാണ് മോട്ടോ എന്നു പേരുള്ള 10 വയസ്സുകാരന്‍ സിംഹത്തിന്റെ മുന്നിലേക്ക് ഒരു സോപ്പ് കുമിള പറന്നു വന്നത്. മുന്‍പ് കണ്ടു പരിചയമില്ലാത്തതിനാലാകണം സംഭവം എന്താണെന്ന് അടുത്തു ചെന്നു പരിശോധിക്കാന്‍ മോട്ടോയെ പ്രേരിപ്പിച്ചത്. എന്നാല്‍ ഈ സോപ്പു കുമിള തന്നെ നാണം കെടുത്തുമെന്ന് സ്വപ്നത്തില്‍ പോലും മോട്ടോ ചിന്തിച്ചിരുന്നില്ല.

കുമിളയെ കാര്യമായി നിരീക്ഷിക്കുന്നതിനിടെ അതു നിലത്തു വീണു പൊട്ടി. ഈ സമയത്ത് കുമിളയുടെ തൊട്ടടുത്തെത്തിയിരുന്ന മോട്ടോ പരിസരം മറന്നു ഞെട്ടിപ്പോയി. ഭയന്ന് രണ്ടടി പിന്നോട്ടു മാറുകയും ചെയ്തു. ഒന്നുമറിയാത്ത മട്ടില്‍ സിംഹരാജന്‍ സ്ഥലം കാലിയാക്കിയെങ്കിലും കാര്യം അവിടം കൊണ്ടവസാനിച്ചില്ല. വീരശൂരപരാക്രമിയായ തനിക്ക് എന്തെങ്കിലും അമളി പറ്റുന്നത് കണ്ട് ആഘോഷിക്കാന്‍ മനുഷ്യന്മാരെന്ന ഒരു വര്‍ഗ്ഗം കൂട്ടിനു വെളിയില്‍ കാത്തുനില്‍പ്പുണ്ടായിരുന്നു എന്നകാര്യം പിന്നീടാണ് മോട്ടു തിരിച്ചറിഞ്ഞത്.

ആ സമയത്തു പാര്‍ക്ക് സന്ദര്‍ശിക്കാനെത്തിയവരിലാരോ ഈ ദൃശ്യം മൊബൈലില്‍ പകത്തിയത് പാവം മോട്ടോ അറിഞ്ഞില്ല. അയാള്‍ സമൂഹമാധ്യമങ്ങളില്‍ വിഡിയോ ദൃശ്യങ്ങള്‍ പങ്കു വച്ചതോടെ സിംഹരാജന്റെ ഞെട്ടല്‍ നാട്ടിലെങ്ങും പാട്ടായി. കാട്ടിലെ രാജാവിന്റെ ഞെട്ടല്‍ കണ്ട് പൊട്ടിച്ചിരിക്കുകയാണ് ആളുകളിപ്പോള്‍. പാവം സിംഹരാജനു പറ്റിയ പറ്റേ!