ജോലി ചെയ്യുന്നത് ഇഷ്ടമാണെങ്കിലും ഓഫീസിലെത്തിയാല്‍ ബോസിന്റെ മുഖം കാണുന്നത് ഓര്‍ക്കുമ്പോള്‍ പലരും നെറ്റിചുളിക്കും. പലപ്പോഴും 'ഭീകര'മായി് ചിത്രീകരിക്കപ്പെട്ടിട്ടുള്ള ഒന്നാണ് മുതലാളി-തൊഴിലാളി ബന്ധം. എന്നാല്‍ ബോസ് ഒരു നല്ല സുഹൃത്തിനെ പോലെയാണെങ്കിലോ? ജീവനക്കാര്‍ക്ക് വേണ്ടി സര്‍പ്രൈസുകളൊക്കെ ഒരുക്കുന്ന ഒരു നല്ല ബോസ്! കേള്‍ക്കാനൊക്കെ ഒരു സുഖമൊക്കയുണ്ട്, പക്ഷേ ഇതു വലതും നടക്കുമോ എന്ന് പറയാന്‍ തോന്നുന്നുണ്ടാവും. എന്നാല്‍ അങ്ങനെയൊരു സംഭവം നടന്നിട്ടുണ്ട്. അങ്ങ് ബ്രിട്ടനില്‍.

ലീ മേക്കറ്റീര്‍ എന്ന 32-കാരനായ കമ്പനി മുതലാളിയാണ് സര്‍െ്രെപസുകള്‍ കൊണ്ട് തന്റെ തൊഴിലാളികളെ അദ്ഭുതപ്പെടുത്തിയത്. ഓഫീസനകത്ത് ബോളുകള്‍ നിറച്ചായിരുന്നു ഒരു സര്‍പ്രൈസ്. ഓഫീസിലേക്ക് കയറി വന്ന ജീവനക്കാര്‍ അന്തംവിട്ടുനില്‍ക്കുന്ന കാഴ്ച ഇതിനോടകം സോഷ്യല്‍മീഡിയയില്‍ വൈറലായി കഴിഞ്ഞു. ബോള്‍ സര്‍പ്രൈസില്‍ ഒതുങ്ങുന്നില്ല ലീയുടെ പ്രവര്‍ത്തികള്‍. വാരിക്കോരി അവധി നല്‍കിയും ജീവനക്കാരെ ലീ ഞെട്ടിച്ചു. അവരെ ലാസ് വേഗസിലേക്ക് കൊണ്ടുപോകുകയും ചെയ്തു.

2010-ലാണ് ഇന്‍വേഷന്‍ എന്ന കമ്പനി ലീ മേക്കറ്റീര്‍ ആരംഭിക്കുന്നത്. കമ്പനി ആരംഭിക്കുമ്പോള്‍ ലീയ്ക്ക് ഒരു കാര്യത്തില്‍ നിര്‍ബന്ധമുണ്ടായിരുന്നു. തന്റെ കമ്പനിയായിരിക്കണം ലോകത്തിലെ ഏറ്റവും രസകരമായ കമ്പനി എന്ന്. 'മനസുകൊണ്ട് ഇപ്പോഴും കുട്ടി' എന്നാണ് ലീ സ്വയം വിശേഷിപ്പിക്കുന്നത്. ഇടയ്ക്കിടക്ക് ജീവനക്കാര്‍ക്ക് സര്‍െ്രെപസ് കൊടുക്കുന്നത് ലീ ഇഷ്ടപ്പെടുന്ന ഒരു കാര്യമാണ്.

ഈ മാസം ആദ്യമാണ് മാഞ്ചസ്റ്ററിലുള്ള ഓഫീസില്‍ 2,50,000 വിവിധ നിറത്തിലുള്ള ബോളുകള്‍ നിറച്ച് ജീവനക്കാരെ അദ്ഭുതപ്പെടുത്തിയത്.

'ജോലി ആസ്വദിച്ചു ചെയ്യാന്‍ കഴിഞ്ഞാല്‍ പിന്നെ ജീവിതത്തിലൊരിക്കലും ജോലി ചെയ്യുന്നത് ഒരു ബുദ്ധിമുട്ടായി തോന്നില്ല. അതിന് വേണ്ടി ഓഫീസ് പരമാവധി രസകരമാക്കാന്‍ ഞാന്‍ ശ്രമിക്കുന്നു', ലീ തന്റെ ജീവനക്കാരോട് പറഞ്ഞതാണ് ഇത്. പുലര്‍ച്ചെ 3 മണി മുതല്‍ 8 മണി വരെ സമയമെടുത്താണ് ബോള്‍ ഓഫീസില്‍ നിറച്ചത്. ജീവനക്കാരുടെ കഠിനാധ്വാനത്തിനുള്ള പ്രതിഫലമായാണ് താന്‍ ഇതെല്ലാം ചെയ്യുന്നതെന്നും ലീ വ്യക്തമാക്കുന്നു.

ഇതിന് പുറമെ ജീവനക്കാര്‍ക്ക് യാത്ര ചെയ്യുന്നതിനുള്ള സൗകര്യവും ലീ ഒരുക്കിക്കൊടുക്കും. കഴിഞ്ഞ മാര്‍ച്ചില്‍ ജീവനക്കാരില്‍ പത്ത് പേര്‍ക്ക് യുഎസില്‍ പല സ്ഥലങ്ങള്‍ കറങ്ങാനുള്ള അവസരം ഒരുക്കിയിരുന്നു. ഇതിന് മുമ്പും ലീ പല തരത്തിലുള്ള സര്‍പ്രൈസുകള്‍ കൊണ്ട് ജീവനക്കാരെ ഞെട്ടിച്ചിട്ടുണ്ട്.