കന്നുകാലികളെ കശാപ്പിനായി വില്‍ക്കുന്നതിനു രാജ്യവ്യാപക നിരോധനം ഏര്‍പ്പെടുത്തിയതിനെതിരേ പ്രതിഷേധങ്ങള്‍ ഉയരുകയാണ്. പ്രതിഷേധ സൂചകമായി എസ്എഫ്‌ഐ ബീഫ് ഫെസ്റ്റും പ്രഖ്യാപിച്ചുകഴിഞ്ഞിരിക്കയാണ്.

സോഷ്യല്‍ മീഡിയയില്‍ ട്രോളുകളും പ്രതിഷേധങ്ങളും നിറയുകയാണ്. ഇതിനിടെ വ്യത്യസ്തമായ ഒരു പ്രതിഷേധവുമായി രംഗത്തെത്തിയിരിക്കുകയാണ് മലയാളികളുടെ പ്രിയതാരം ടോവിനോ തോമസ്. മറ്റൊന്നുമല്ല, ഇപ്പോള്‍ തീയറ്ററുകളില്‍ തകര്‍ത്തോടുന്ന സ്വന്തം ചിത്രമായ ഗോദയിലെ ക്ലിപ്പ് ഇട്ടാണ് താരത്തിന്റെ പ്രതിഷേധം.

'ഈ പൊറോട്ടയും ബീഫ്‌റോസ്റ്റും നമ്മള്‍ മലയാളികള്‍ക്ക് വെറുമൊരു ഭക്ഷണം മാത്രമല്ല.. ഒരു വികാരമാണ്...' എന്ന അടിക്കുറിപ്പോടെയാണ് വീഡിയോ പോസ്റ്റ് ചെയ്തിരിക്കുന്നത്.

ടോവിനോയുടെ കഥാപാത്രം പൊറോട്ടയുടെയും ബീഫ് റോസ്റ്റിന്റേയും മഹത്വം പറയുന്നതാണ് വീഡിയോയില്‍. ബീഫ് റോസ്റ്റ് ഉണ്ടാക്കുന്ന വിധവും വിവരിക്കുന്നുണ്ട്.

ടോവിനോ ഫേസ്ബുക്കില്‍ ഷെയര്‍ ചെയ്ത വീഡിയോ ഇതിനോടകം വൈറലായിക്കഴിഞ്ഞു. അജു വര്‍ഗീസും സംവിധായകന്‍ ബേസില്‍ ജോസഫുമടക്കം നിരവധി പേര്‍ വീഡിയോ ഷെയര്‍ ചെയ്തിട്ടുണ്ട്.