പുലിപ്പാല്‍ എടുത്ത അയ്യപ്പന്റെ ചരിത്രമാണ് നമുക്കറിയാവുന്നതെങ്കില്‍ പുലിയെ കണ്ട് പേടിച്ചോടുന്ന അയ്യപ്പന്റെ വീഡിയോ ആണ് ഇപ്പോള്‍ സൈബര്‍ ലോകത്തെ കുടുകുടെ ചിരിപ്പിക്കുന്നത്. ഒരു ഫാന്‍സി ഡ്രസ് മത്സരത്തില്‍ നിന്നുള്ള അയ്യപ്പന്റേയും പുലിയുടേയും ദൃശ്യങ്ങളാണ് സോഷ്യല്‍ മീഡിയയില്‍ തരംഗമാവുന്നത്.

പുലിയെ ഔദ്യോഗിക വാഹനമാക്കിയ അയ്യപ്പന്റെ വേഷമണിഞ്ഞ് ഫാന്‍സിഡ്രസ്സിനെത്തിയ കുഞ്ഞ് പുറകില്‍ 'പുലി' എത്തിയത് അറിഞ്ഞില്ല. അയ്യപ്പനായി വേദിയില്‍ അവതരിച്ച കുഞ്ഞ് കാണികളുടെ പൊട്ടിച്ചിരി കേട്ടാണ് തിരിഞ്ഞു നോക്കിയത്. നോക്കിയപ്പോഴതാ മുന്നില്‍ കയറുംപൊട്ടിച്ചൊച്ചൊരു പുലി..!പിന്നെ ചിന്തിച്ചൊന്നും നിന്നില്ല, മുന്നും പിന്നും നോക്കാതെ ഒരൊറ്റ ഓട്ടമായിരുന്നു....

വാട്ട്‌സാപ്പില്‍ നിറഞ്ഞോടുന്ന ഒരു വീഡിയോ ആണിത്. ഫാന്‍സിഡ്രസ് മത്സരത്തില്‍ പുലിവേഷമണിഞ്ഞ് വേദിയില്‍ എത്താനിരുന്ന മറ്റൊരു കുട്ടിയാണ് അയ്യപ്പന്റെ പിന്നിലെത്തിയത്. തിരിഞ്ഞു നോക്കിയപ്പോള്‍ അപ്രതീക്ഷിതമായി മുന്നില്‍ പുലിയെ കണ്ടതോടെ അയ്യപ്പനായി വേഷമിട്ട കുഞ്ഞ് പേടിച്ചോടുകയായിരുന്നു.കാണികളില്‍ ചിരി പടര്‍ത്തുന്ന അയ്യപ്പന്റെ ഓട്ടം വാട്ട്‌സാപ്പിലും ഫെയ്‌സ്ബുക്കിലും ഏറെ വൈറലായി കഴിഞ്ഞിട്ടുണ്ട്.

എറണാകുളം പെരുമ്പിള്ളി സ്വദേശികളായ വിജിത്ത് രാധിക ദമ്പതികളുടെ മകളായ വൈഗ കൃഷ്ണയാണ് സോഷ്യല്‍ സൈറ്റില്‍ വൈറലായ അയ്യപ്പന്റെ വേഷം കെട്ടിയത്. പെരുമ്പിള്ളിയില്‍ ഒരു അംഗനവാടി പരിപാടിക്കിടെ നടന്നതാണ് സംഭവം.