മധ്യപ്രദേശിലെ സാഗറില്‍ നിന്ന് ആനയുമായി ബന്ധപ്പെട്ടുള്ള ഒരു വീഡിയോ സോഷ്യല്‍ മീഡിയയില്‍ വൈറലാകുന്നു.

എഎന്‍ഐ ആണ് വീഡിയോ പുറത്തുവിട്ടിട്ടുള്ളത്. വെറ്റില മുറുക്ക് തേടി എന്നും കടയില്‍ എത്തുന്ന ഒരു ആനയുടെയും കടക്കാരന്റെയും വീഡിയോ ആണ് ഇതിനോടകം വൈറലായിരിക്കുന്നത്.

പണ്ട് ഒരു തയ്യല്‍ക്കാരന്റേയും ആനയുടേയും കഥ നമ്മളെല്ലാവരും കേട്ടിട്ടുള്ളതാണ്. ആനയെ കുളിപ്പിക്കാന്‍ കൊണ്ടുപോകുന്ന വഴിയിലുള്ള ഒരു തയ്യല്‍ക്കടക്കാരന്‍ സ്ഥിരമായി ആനയ്ക്ക് പഴം കരുതിവയ്ക്കുമായിരുന്നുവെന്നും അതുകൊണ്ട് ആ കടയുടെ മുന്നിലെത്തുമ്പോള്‍ ആന തുമ്പിക്കൈ കടയ്ക്കുള്ളിലേക്ക് നീട്ടുമായിരുന്നുവെന്നും തയ്യല്‍ക്കടക്കാരന്‍ പഴം ആനയുടെ തുമ്പിക്കൈയ്യില്‍ വച്ചുകൊടുക്കുകയും ചെയ്യുമായിരുന്നത്രേ. എന്നാല്‍ ഒരു ദിവസം കടക്കാരന് ഒരു തമാശ തോന്നി.അന്ന് പഴം കിട്ടാന്‍ തുമ്പിക്കൈ നീട്ടിയപ്പോള്‍ പഴം കൊടുക്കാതെ പകരം സൂചി കൊണ്ട് തുമ്പിക്കൈയ്യില്‍ ഒരു ചെറിയ കുത്തുകൊടുത്തു. അതുകൊണ്ട് അന്ന് കുളിച്ചിട്ടു തിരിച്ചു വരുമ്പോള്‍ ആന തുമ്പിക്കൈയ്യില്‍ വെള്ളം നിറച്ചുകൊണ്ടാണത്രേ വന്നത്. കടയുടെ മുന്നിലെത്തിയപ്പോള്‍ ആ വെള്ളം മുഴുവന്‍ ആ തയ്യല്‍ക്കാരന്റെ ദേഹത്തേക്ക് ചീറ്റിത്തെറിപ്പിച്ച് പകരം വീട്ടിയെന്നാണ് ആ കഥ.

താന്‍ കൊടുക്കുന്ന വെറ്റില മുറുക്ക് തേടി കഴിഞ്ഞ 14 വര്‍ഷമായി ഈ വെറ്റിലക്കടയിലെ സ്ഥിരം സന്ദര്‍ശകയാണ് ഈ പിടിയാനയെന്ന് കടക്കാരന്‍ പറയുന്നു. കടയിലെ 'ദേശി പാന്‍' എന്നറിയപ്പെടുന്ന മുറുക്ക് കൂട്ടാണ് ആനയ്ക്ക് പ്രിയം.പഴയ കഥയിലെ തയ്യല്‍ക്കടക്കാരന് തോന്നിയപോലെയുള്ള തമാശ കാണിക്കാനൊന്നും മധ്യപ്രദേശിലെ പാന്‍ കടക്കാരന് തോന്നാതിരുന്നാല്‍ കൊള്ളാം...!