റയില്‍വേട്രാക്കിനും മരണത്തിനുമിടയില്‍നിന്നും ഭാഗ്യത്തിന്റെ ആനുകൂല്യം കൊണ്ട് ജീവിതം തിരിച്ചുപിടിച്ച് ഒരു പെണ്‍കുട്ടി. മുബൈ കുര്‍ള റയില്‍വേ സ്‌റ്റേഷനില്‍ നടന്ന അപകടത്തിന്റേയും, അത്ഭുതകരമായ രക്ഷപെടലിന്റേയും ദൃശ്യങ്ങള്‍ പുറത്ത്.

മുംബൈ-കുര്‍ള റയില്‍വേ സ്‌റ്റേഷനിലാണ് സംഭവം. ഒരു പെണ്‍കുട്ടി മൊബൈല്‍ ഫോണില്‍ സംസാരിച്ചുകൊണ്ട് അശ്രദ്ധമായി ട്രാക്ക് മുറിച്ചുകടക്കുന്നു. താന്‍ നടക്കുന്ന ട്രാക്കിലൂടെ ഗുഡ്‌സ് ട്രെയിന്‍ വരുന്നുവെന്ന അറിയിപ്പൊന്നും കേള്‍ക്കാതെ ഇയര്‍ഫോണും ചെവിയില്‍ തിരുകിയുള്ള നടപ്പ്. അപകടംമുന്നില്‍കണ്ട് പ്ലാറ്റ്‌ഫോമിലുണ്ടായിരുന്നവര്‍ ഉച്ചത്തില്‍ നിലവിളിച്ചു. ആളുകളുടെ ബഹളംകേട്ട് പെണ്‍കുട്ടിയോടിയത് ട്രെയിന്‍വരുന്ന ദിക്കിലേക്ക് തന്നെ. നിമിഷങ്ങള്‍ക്കകം എല്ലാം സംഭവിച്ചു.

കുട്ടിയെ ഇടിച്ചിട്ട വിവരം അറിഞ്ഞ ലോക്കോപൈലറ്റ് ട്രെയിന്‍ പൊടുന്നനെ ബ്രേക്ക്‌ചെയ്തു. അതിശയപ്പെടുത്തുന്നതായിരുന്നു പിന്നീടുള്ള കാഴ്ചകള്‍. ട്രെയിനിന് അടിയില്‍പെട്ട പെണ്‍കുട്ടി ശരീരത്തിലെ പൊടിയുംതട്ടി പതിയെ എഴുന്നേറ്റുവരുന്നു. മരണം മണത്ത പാളത്തില്‍നിന്നും അതിശയിപ്പിക്കും വിധമുള്ള തിരിച്ചുവരവ്. ഈ പുനര്‍ജന്‍മത്തിനുടമയായ പെണ്‍കുട്ടിയുടെ പേര് അറിയണോ... പ്രതീക്ഷ എന്നാണ് അവളുടെ പേര്.