ചൈനയിലെ നിങ്‌ബോയിലെ യങ്ങര്‍ മൃഗശാല സന്ദര്‍ശിക്കാന്‍ ഭാര്യയ്ക്കും കുട്ടിക്കുമൊപ്പം കഴിഞ്ഞ ദിവസം എത്തിയ ഒരു യുവാവ് കടുവകളുടെ ആക്രമണത്തില്‍ കൊല്ലപ്പെട്ടിരുന്നു. കടുവകളുടെ സങ്കേതത്തിലേക്ക് അതിക്രമിച്ചു കടന്നതിനാലായിരുന്നു യുവാവിന്റെ ദാരുണാന്ത്യം.

അതിനു പിന്നാലെയാണ് ചൈനയിലെ മറ്റൊരു മൃഗശാലയില്‍ ജീവനക്കാരനെ സീബ്ര ആക്രമിക്കുന്ന ദൃശ്യങ്ങള്‍ പുറത്തു വന്നിരിക്കുന്നത്. ഗുവാന്‍ഷ്വോയിലെ ഷിമെലോങ് സഫാരി പാര്‍ക്കില്‍ നിന്നുള്ളതാണ് രണ്ടു മിനിട്ടു നീളുന്ന ദൃശ്യങ്ങള്‍.

പരിശീലകനെ വകവയ്ക്കാതിരുന്ന സീബ്രയാണ് ഇവിടുത്തെ വില്ലന്‍. കാണികള്‍ നോക്കി നില്‍ക്കുമ്പോള്‍ തന്നെ അക്രമാസക്തനായ സീബ്ര ജീവനക്കാരനെ കടിച്ചുവലിച്ച് തറയിലൂടെ വലിച്ചിഴയ്ക്കുകയായിരുന്നു. ഇതുകണ്ടു നിന്ന മറ്റുള്ള ജീവനക്കാര്‍ വടിയുമായി സീബ്രയെ ഓടിക്കാന്‍ പിന്നാലെ ചെന്നെങ്കിലും കുറച്ചുദൂരം പോയി കഴിഞ്ഞ ശേഷമാണ് അവര്‍ക്ക് ജീവനക്കാരനെ മോചിപ്പിക്കാന്‍ സാധിച്ചത്.

ജീവനക്കാരന്റെ പരിക്ക് ഗുരുതരമല്ല. ഇത്തരം സംഭവം ആദ്യമായാണു നടക്കുന്നതെന്നും മൃഗശാലാ അധികൃതര്‍ പറഞ്ഞു.