തെംസ് നദിയിലേക്ക് വീണ നായയെ അതിസാഹസികമായി രക്ഷപ്പെടുത്തിയ ഒരു യുവാവാണ് സമൂഹമാധ്യമങ്ങളില്‍ ഇപ്പോഴത്തെ താരം. നായ പുഴയിലേക്ക് വീഴുന്നത് കണ്ട് യുവാവ് അല്‍പ്പം പോലും അറച്ചുനില്‍ക്കാതെ പുഴയിലേക്ക് എടുത്തുചാടുകയായിരുന്നു. നായയെ രക്ഷപ്പെടുത്തിയെങ്കിലും തിരികെ കരയിലെത്താനാവാതെ അവന്‍ ബുദ്ധിമുട്ടി.

സംഭവമറിഞ്ഞതോടെ രക്ഷാപ്രവര്‍ത്തകരും സ്ഥലത്തെത്തി. രക്ഷാപ്രവര്‍ത്തകര്‍ കാണുമ്പോള്‍ രക്ഷപ്പെടുത്തിയ നായയെ ഒരു കയ്യില്‍ പിടിച്ച് മറുകൈകൊണ്ട് നദിയുടെ ഭിത്തിയില്‍ സ്ഥാപിച്ച ചങ്ങലയില്‍ പിടിച്ച് നില്‍ക്കുന്ന അവസ്ഥയിലായിരുന്നു യുവാവ്. ആദ്യം നായയെ ആണ് രക്ഷാപ്രവര്‍ത്തകര്‍ അവര്‍ വന്ന ബോട്ടിലേക്ക് കയറ്റിയത്. പിന്നാലെ യുവാവിനേയും.

കരയിലെത്തിയപ്പോഴാണ് കഥയില്‍ ഒരു ട്വിസ്റ്റ് സംഭവിക്കുന്നത്. രക്ഷകനായ യുവാവായിരുന്നില്ല നായ്ക്കുട്ടിയുടെ യഥാര്‍ത്ഥ ഉടമസ്ഥന്‍. ശരിക്കുമുള്ള ഉടമസ്ഥന്‍ നായ്ക്കുട്ടി പുഴയില്‍ വീണ ആവലാതിയുമായി കരയില്‍ നില്‍ക്കുകയായിരുന്നു. നായക്കുട്ടിയെ തിരിച്ചുകിട്ടിയപ്പോള്‍ രക്ഷകനേക്കുറിച്ച് നൂറുനാവായിരുന്നു നായക്കുട്ടിയുടെ ഉടമസ്ഥനെന്ന് പ്രത്യേകിച്ച് പറയേണ്ട ആവശ്യമില്ലല്ലോ.