ഇപ്പോള്‍ സമൂഹമാധ്യമങ്ങളില്‍ ചര്‍ച്ചയാകുന്നത് പാപ്പാനു മുത്തം നല്‍കുന്ന ആനയുടെ ദൃശ്യങ്ങളാണ്. പാപ്പാന്‍ യാത്രചോദിക്കുമ്പോള്‍ ചരിഞ്ഞുനിന്നു മുത്തം കൊടുക്കുന്ന ആനയുടെ ദൃശ്യങ്ങള്‍ക്ക് കാഴ്ചക്കാരേറെയുണ്ട്.

ആനയും പാപ്പാനും തമ്മിലുള്ള സൗഹൃദകഥകള്‍ ഏറെയുണ്ടെങ്കിലും അതില്‍ നിന്നെല്ലാം വ്യത്യസ്തമാണ് ഇവരുടെ കഥ. തന്റെ പാപ്പാനെ ഇത്രയധികം സ്‌നേഹിക്കുന്ന കൊമ്പന്‍ കൊല്ലത്തിനു സമീപം തൃക്കടവൂരുള്ള ശിവരാജുവെന്ന ആനയാണ്.

ശിവരാജിന്റെ പാപ്പാനായ കണ്ണനാണ് ആ ഭാഗ്യവാന്‍. വൈകുന്നേരത്തെ ആഹാരം നല്‍കി മടങ്ങുന്നതിനിടെയായിരുന്നു ആനയുടെ സ്‌നേഹപ്രകടനം. പോകട്ടേയെന്നുള്ള പാപ്പാന്റെ ചാദ്യത്തിനു തീറ്റയെടുക്കുന്നതിനിടയിലും തലകുലുക്കി ശിവരാജു മറുപടി നല്‍കുന്നതും വിഡിയോയില്‍ വ്യക്തമാണ്.

പിന്നീട് തലചായ്ച്ച് ചരിഞ്ഞു നിന്നു പതിവു മുത്തം. രണ്ടാം പാപ്പാനായ പ്രവീണാണ് രസകരമായ ഈ ദൃശ്യങ്ങള്‍ മൊബൈലില്‍ പകര്‍ത്തിയത്.