ഡ്രൈവ് ത്രൂ റസ്റ്ററന്റ് എന്നൊക്കെ കേട്ടിട്ടുണ്ടല്ലോ? നമ്മള്‍ വന്ന വാഹനത്തില്‍ നിന്നുമിറങ്ങാതെ അതിലിരുന്നുകൊണ്ടു തന്നെ റസ്റ്ററന്റില്‍ നിന്നും നമുക്കാവശ്യമുള്ളവ പാഴ്‌സലായി വാങ്ങി ഡ്രൈവ് ചെയ്ത് തിരിച്ചുപോകാന്‍ സൗകര്യമുള്ള റസ്റ്ററന്റുകളെയാണ് ഡ്രൈവ് ത്രൂ റസ്റ്ററന്റ് എന്നു പറയുന്നത്.അത്തരം റസ്റ്ററന്റുകള്‍ ഉള്ളതായി നമുക്കറിയാം.

എന്നാല്‍ ചൈനയിലെ ഴെങ്ജിയാങിലെ ഒരു ഡ്രൈവര്‍ ഒരു കണ്‍വീനിയന്‍സ് സ്റ്റോറിനെ തന്നെ ഡ്രൈവ് ത്രൂ ആക്കിക്കളഞ്ഞു. തിരക്കിട്ടുള്ള ഒരു യാത്രയായിരുന്നു.അതിനിടെ അത്യാവശ്യ സാധനങ്ങള്‍ വാങ്ങാന്‍ കടയിലേക്ക് ഈ ഡ്രൈവര്‍ എത്തിയത് എങ്ങനെയെന്ന് അറിയാമോ?

കാര്‍ പാര്‍ക്കിംഗിന് സമയം കളയാനില്ലാത്തതിനാല്‍ കാര്‍ നേരെ കടയ്ക്കുള്ളിലേക്ക് ഓടിച്ചുകയറ്റുകയാണ് ചെയ്തത്. കടയില്‍ നിന്നുള്ള സിസിടിവി ചിത്രം പീപ്പിള്‍സ് ഡെയ്‌ലിയുടെ ഫേസ്ബുക്ക് പേജില്‍ എത്തി.

കാര്‍ വരുന്നത് കണ്ട് ഷോപ്പിലെ ജീവനക്കാരന്‍ ശരിക്കും ഞെട്ടി. കാര്യമറിയാന്‍ ഇയാള്‍ ഓടി കാറിനടുത്തെത്തി. തിരക്കാണെന്ന് മനസ്സിലായതോടെ ഡ്രൈവര്‍ ആവശ്യപ്പെട്ട സാധനങ്ങള്‍ ജീവനക്കാരന്‍ തന്നെ എടുത്തു നല്‍കി.

എന്നാല്‍ ഇത്ര സാഹസപ്പെട്ട് ഡ്രൈവര്‍ എന്തു വാങ്ങാനാണ് എത്തിയതെന്ന് കേട്ടാല്‍ ശരിക്കും ഞെട്ടും. ഒരുപായ്ക്കറ്റ് ചിപ്‌സും കട്ടിത്തൈരുമാണ് ഇയാള്‍ വാങ്ങിയത്.