വീടിന്റെ ഗേറ്റിനു മുന്നില്‍ കിടന്ന ആ ചെറിയ 'സാധനം' തന്റെ ജര്‍മ്മന്‍ ഷെപ്പേര്‍ഡിന് കളിക്കാന്‍ കൊടുക്കാമെന്ന് കരുതിയാണ് കാലിഫോര്‍ണിയ സ്വദേശിനിയായ ആ സ്ത്രീ അത് കുനിഞ്ഞെടുത്തത്. എന്നാല്‍ അതൊരു വന്‍ അബദ്ധമായിരുന്നു. നവമാധ്യമങ്ങളില്‍ വലിയ ചിരിപടര്‍ത്തി ആ ദൃശ്യങ്ങള്‍ ഇപ്പോള്‍ വൈറലായിരിക്കുകയാണ്.

ബാത്ത്‌റൂം വേഷത്തില്‍ ഇരുട്ടില്‍ ഒരു ടോര്‍ച്ചുമായി വരുന്ന സ്ത്രീ ഗേറ്റിനു മുന്നില്‍ കിടക്കുന്ന അജ്ഞാത വസ്തു കുനിഞ്ഞെടുത്തു. തന്റെ നായ്ക്കുട്ടിക്ക് കളിക്കാന്‍ ഇട്ടുകൊടുക്കുക ആയിരുന്നു അവരുടെ ഉദ്ദേശം. എന്നാല്‍ എടുത്തപ്പോഴാണ് അതൊരു പാമ്പിന്റെ കുഞ്ഞാണെന്ന് അവര്‍ക്ക് മനസ്സിലായത്. ഇതോടെ അതിനെ വലിച്ചെറിഞ്ഞ് നിലവിളിച്ചുകൊണ്ട് ഓടുന്ന അവരും അവരോടൊപ്പമുണ്ടായിരുന്ന ജര്‍മ്മന്‍ ഷെപ്പേര്‍ഡിന്റേയും വീഡിയോ ആണ് യു ട്യൂബില്‍ പ്രചരിക്കുന്നത്.

ഒരിനം വിഷപ്പാമ്പിനെയാണ് അവര്‍ കൈയ്യിലെടുത്ത്. അഗ്‌നിശമന സേനയെ വിളിച്ചാണ് പിന്നീട് പാമ്പിനെ വകവരുത്തിയത്. ഭാഗ്യം കൊണ്ട് മാത്രമാണ് അവര്‍ കടികൊള്ളാതെ രക്ഷപ്പെട്ടത്. കുഞ്ഞുപാമ്പായതിനാല്‍ വിഷം എത്രമാത്രം ഉണ്ടാകുമെന്ന് വ്യക്തമല്ല. പേടിമാറ്റാന്‍ അവരെയും മൂന്ന് പെണ്‍മക്കളെയും ആശുപത്രിയില്‍ കൊണ്ടുപോയതായും നായ്ക്കുട്ടിയെ വെറ്ററിനറി ഡോക്ടറെ കാണിച്ചതായും ഭര്‍ത്താവ് പറഞ്ഞു. ചിരിപടര്‍ത്തുന്ന ഈ വീഡിയോ ഭര്‍ത്താവ് തന്നെയാണ് യു ട്യൂബില്‍ പോസ്റ്റ് ചെയ്തത്.