തങ്ങളുടെ അധികാര പരിധിയില്‍ മറ്റൊരാള്‍ കൈകടത്തിയാല്‍ അത് ആര്‍ക്കും ഇഷ്ടപ്പെടില്ല തന്നെ.പ്രത്യേകിച്ചും മൃഗങ്ങള്‍. താന്‍ നില്‍ക്കുന്നിടം അത് തന്റെ സാമ്രാജ്യമായാണ് അവര്‍ കരുതുക.

ഇതാണ് ഇവിടെയും സംഭവിച്ചിരിക്കുന്നത്. മയിലിനെ തുരത്തി ഓടിക്കുന്ന ഒരു പാണ്ടയുടെ ദൃശ്യങ്ങളാണ് ഇപ്പോള്‍ സമൂഹമാധ്യമങ്ങളില്‍ കൗതുകമുണര്‍ത്തുന്നത്.

പാണ്ടകളുടെ കുസൃതി എന്നും ആളുകള്‍ക്കേറെയിഷ്ടമാണ്. അത് ആളുകളില്‍ കൂടുതല്‍ ചിരിപടര്‍ത്തുകയും ചെയ്യും. അങ്ങനെയൊരു വീഡിയോയാണ് ഇപ്പോള്‍ സമൂഹമാധ്യമങ്ങളില്‍ തരംഗമാകുന്നത്.

ചൈനയിലെ ഷെങ്ഡു പാണ്ട റിസേര്‍ച്ചിലാണ് രസകരമായ ഈ സംഭവം നടന്നത്. കാര്‍ട്ടൂണ്‍ ചിത്രമായ കുങ്ഫൂ പാണ്ടയില്‍ നിന്നും പ്രചോദനമുള്‍ക്കൊണ്ടാണോയെന്നറിയില്ല തകര്‍പ്പന്‍ പ്രകടനമായിരുന്നു പാണ്ടയുടേത്.

പീലിവിരിച്ചിരുന്ന ഒരു മയിലിനെയാണ് പിന്നാലെയെത്തിയ പാണ്ടന്‍ ഓടിച്ചത്. തന്റെ പരിധിക്കുള്ളില്‍ കടന്ന മയിലിനെ ഒരിടത്തും ഇരുത്താന്‍ പാണ്ട തയാറായിരുന്നില്ല. മയിലിന്റെ പിന്നാലെ ഓടിയ പാണ്ട അതിനെ പുറത്താക്കിയ ശേഷമാണ് പിന്തിരിഞ്ഞത്.

മയിലിനെ പുറത്താക്കിയ സന്തോഷം തറയില്‍ കിടന്നുരുണ്ടാണ് പാണ്ട പ്രകടിപ്പിച്ചത്. ജൂണ്‍ 26-ന് പോസ്റ്റ് ചെയ്ത ദൃശ്യങ്ങള്‍ ഇപ്പോള്‍ തന്നെ മൂവായിരത്തിലധികം ആളുകള്‍ കണ്ടുകഴിഞ്ഞു.