നമ്മുടെ വായില്‍ നിന്നും മൂക്കില്‍ നിന്നും എട്ടുകാലികള്‍ ഇറങ്ങിവരുന്നത് സങ്കല്പ്പിക്കാനെങ്കിലും ധൈര്യമുള്ളവര്‍ എത്രപേരുണ്ടാവും? ആലോചിക്കുമ്പോള്‍ തന്നെ പേടിയാണ്.

ഭിത്തിയിലും മറ്റും ഓടികളിക്കുന്ന എട്ടുകാലിയെ പോലും നമ്മള്‍ വെറുതെ വിടാറില്ല. തക്കം കിട്ടിയാല്‍ അതിനെ കൊല്ലാനും തുനിയുന്നവരാണ് എല്ലാവരും.

എങ്കിലിതാ, ഈസ്റ്റ് ലണ്ടനിലെ ഡഗെന്‍ഹാം സ്വദേശിയായ റേ എന്നയാള്‍ തന്റെ സുഹൃത്ത് സ്റ്റുവര്‍ട്ട് പവറിനെ ഭയപ്പെടുത്താന്‍ ചെയ്തത് കണ്ട് സോഷ്യല്‍ മീഡിയ മുഴുവന്‍ ഞെട്ടിയിരിക്കുകയാണ്.

റേ വായ തുറക്കുമ്പോള്‍ ഒരു എട്ടുകാലി വായില്‍ നിന്ന് ഇറങ്ങി വരുന്നതാണ് ദൃശ്യങ്ങളില്‍ കാണുന്നത്. ദൃശ്യങ്ങള്‍ കാണുമ്പോള്‍ തന്നെ അറപ്പു തോന്നുന്ന തരത്തിലാണ് പ്രകടനം.

തനിക്ക് എട്ടുകാലികളെ ഇഷ്ടമല്ലെന്ന് തന്റെ പ്രിയപ്പെട്ട സുഹൃത്തിന് അറിയാമെന്നും തന്നെ പേടിപ്പിക്കാനാണ് വീട്ടില്‍ നിന്നും പിടിച്ച എട്ടുകാലിയെ വായില്‍ ഇട്ട് സുഹൃത്ത് അത് ചിത്രീകരിച്ചതെന്നാണുമാണ് സ്റ്റുവര്‍ട്ട് പറയുന്നത്.

എട്ടുകാലി അദ്ദേഹത്തെ ഉപദ്രവിക്കാതെയാണ് വായില്‍ നിന്നും ഇറങ്ങിവരുന്നത്. ഈ ദൃശ്യങ്ങള്‍ ഇതിനോടകം തന്നെ വൈറലായി കഴിഞ്ഞിരിക്കുകയാണ്.