ഓണ്‍ലൈന്‍ ലോകത്ത് ഇപ്പോള്‍ ഈ ചിത്രം ഒരു ചര്‍ച്ചാവിഷയമാണ്. പേടിപ്പിക്കുന്ന ചിരിയും കുട്ടികളെ ആകര്‍ഷിക്കുന്ന തരത്തിലുള്ള വേഷവും ബലൂണുകളുമൊക്കെയായി ഒരു രൂപം. കാഴ്ചയില്‍ പേടിയാകുന്ന രൂപം ഇപ്പോള്‍ ഇന്റര്‍നെറ്റ് ലോകത്തും ഭീതി നിറച്ചുകൊണ്ടിരിക്കുകയാണ്. എന്നാല്‍ ഈ ചിത്രത്തിലുള്ളത് ഒരു മൂന്ന് വയസുകാരന്റെ തമാശ മാത്രമാണ്.

സ്റ്റീഫന്‍ കിങ്ങിന്റെ പ്രശസ്ത നോവലിനെ അടിസ്ഥാനമാക്കി പുറത്തിറങ്ങിയ 'ഇറ്റ്' എന്ന ഹൊറര്‍ ചിത്രം തീയേറ്ററുകളില്‍ വന്‍ ആരവം സൃഷ്ടിച്ചു കൊണ്ടിരിക്കുകയാണ്. ചിത്രത്തിലെ പെന്നിവൈസ് എന്ന ആ കഥാപാത്രം കണ്ടു പേടിക്കാത്തവര്‍ വളരെ വിരളമാണ്. ഇതിനിടയിലാണ് മൂന്ന് വയസുകാരന്‍ ലൂയിയുടെ കുസൃതി.

പെന്നിവൈസിനെപ്പോലെ തന്നെ വസ്ത്രം ധരിച്ച് അതേ മേക്കപ്പും ഭാവവുമൊക്കെയായി ഓണ്‍ലൈന്‍ ലോകത്തെ പേടിപ്പിച്ചിരിക്കുകയാണ് ഈ കുട്ടിത്താരം. സ്റ്റീഫന്‍ കിങ്ങിന്റെ കട്ടഫാനാണ് ലൂയി. ഫോട്ടോഗ്രഫിയില്‍ തല്‍പരനായ ലൂയിയുടെ സഹോദരന്‍ ഈഗനന്റെ കരവിരുതാണ് കുഞ്ഞനുജനെ മേക്കപ്പ് ചെയ്ത് പെന്നിവൈസ് ആക്കിമാറ്റിയത്.

കഥാപാത്രത്തെക്കുറിച്ച് യാതൊരു അറിവുമില്ലാതെയാണ് തന്റെ അനുജന്‍ താന്‍ പറഞ്ഞതനുസരിച്ച് ഫോട്ടോഷൂട്ടിന് തയ്യാറായതെന്ന് ഈഗന്‍ പറയുന്നു. തന്റെ മറ്റ് ഫോട്ടോകളില്‍ നിന്നും ഇത് വ്യത്യസ്തമാര്‍ന്നതാണെന്നും ഇതില്‍ തനിക്ക് ഒരുപാട് സന്തോഷമുണ്ടെന്നും ഈഗന്‍ പറഞ്ഞു.

ഈഗന്‍ ഫെയ്‌സ്ബുക്കില്‍ ഷെയര്‍ ചെയ്ത ഫോട്ടോയ്ക്ക് മികച്ച പ്രതികരണമാണ് ലഭിച്ചത്. ഇതിനോടകം 5000-ത്തിലധികം ലൈക്കുകളാണ് ചിത്രത്തിന് ലഭിച്ചത്. നിരവധി പേര്‍ ചിത്രം ഷെയര്‍ ചെയ്യുകയും ചെയ്തു. അതേസമയം ചിത്രത്തിന് മോശം പ്രതികരണങ്ങളും ലഭിച്ചതായി ഈഗന്‍ പറഞ്ഞു. ഫോട്ടോഷൂട്ടിനായി തന്റെ അനുജനെ ചൂഷണം ചെയ്തതായി ചിലര്‍ പ്രതികരിച്ചു. എന്നാല്‍ 90 ശതമാനവും നല്ല പ്രതികരണങ്ങളായതിനാല്‍ മോശം പ്രതികരണത്തെക്കുറിച്ച് തനിക്ക് ടെന്‍ഷനില്ലെന്നും ഈഗന്‍ പറഞ്ഞു.

പെന്നിവൈസിന്റെ രണ്ടേ രണ്ടു ഭാവങ്ങളാണ് എല്ലാ ചിത്രങ്ങളിലും ലൂയി അനുകരിച്ചിരിക്കുന്നത്. അതിലൊന്ന് ചിരിയോടെ നില്‍ക്കുന്നതും മറ്റൊന്ന് ദേഷ്യ ഭാവത്തില്‍ നില്‍ക്കുന്നതുമാണ്. എന്തായാലും ഓമനത്തമുള്ള ലൂയിയുടെ മുഖം പെന്നിവൈസിനെപ്പോലെ ഭീകരരൂപമാക്കി മാറ്റിയ ഈഗന്‍ ഫോട്ടോഗ്രഫിയില്‍ ബഹുദൂരം മുന്നോട്ട് പോകുമെന്നാണ് മിക്കവരുടേയും പ്രതികരണം.