ഏറ്റവും പ്രായമേറിയ ബൈക്ക് യാത്രികന് ഓര്മ്മയായി!
ബൈക്കില് ചെത്തിയടിക്കാന് ഇഷ്ടമില്ലാത്താ ആരും തന്നെയുണ്ടാകില്ല. ബൈക്ക് സവാരി അത്രയ്ക്ക് രസകരമായ ഒന്നാണ്. ചിലര്ക്ക് ഏറെ ദൂരങ്ങള് താണ്ടുന്നതിനോടാകാം, മറ്റു ചിലര്ക്ക് ചെറിയ യാത്രകളിലായിരിക്കാം കമ്പം. ഇത്തരത്തില് പതിറ്റാണ്ടുകള് ബൈക്ക് സവാരി നടത്തുന്ന ചിലയാളുകള് ഉണ്ടായിരുന്നു. അത്തരത്തിലുള്ള ഒരാള് അടുത്തിടെ ലോകത്തോട് വിട പറഞ്ഞു. ബ്രിട്ടനില് നിന്നുമുള്ള 101 വയസുകാരനായ ജാക്ക് സ്റ്റെയേര്സാണ് മരണമടഞ്ഞത്.
ചെറുപ്രായത്തില് തന്നെ ബൈക്ക് സവാരി നടത്തി തുടങ്ങിയ ആളാണ് ജാക്ക്. അതായത് 97 വര്ഷങ്ങള്ക്ക് മുന്പ് തന്നെ ജാക്കിന് ബൈക്കുകളോടുള്ള താത്പര്യം തുടങ്ങിയിരുന്നു. പിന്നീട് അങ്ങോട്ട് ബൈക്ക് യാത്രകളായിരുന്നു ജാക്കിന്റെ ജീവിതം മുഴുവന്. എഴുപത് വയസിനിടെ 10 തവണയാണ് ജാക്ക് തന്റെ ലൈസന്സ് പുതുക്കിയത്.
ഏഴ് വയസില് തന്റെ പിതാവ് ആദ്യമായി മോട്ടോര് ബൈക്കിലെത്തിയ സന്ദര്ഭം ജാക്ക് മരിക്കുന്നതിന് മുന്പ് ഒരു ചാനല് ഷോയില് അനുസ്മരിച്ചിരുന്നു. ഗ്രാമര് സ്കൂള് വിദ്യാര്ത്ഥിയായിരുന്ന തനിക്ക് ആദ്യം വിശ്വസിക്കാന് സാധിച്ചില്ലെങ്കിലും പിന്നീട് താന് തന്നെ ബൈക്കില് സ്കൂളിലേക്ക് പോയപ്പോള് മറ്റുള്ളവര് കൗതുകത്തോടെ വീക്ഷിച്ച് നിന്നത് ഇപ്പോഴും ഓര്ക്കുന്നുവെന്നും ജാക്ക് പറയുന്നു.
അടുത്തിടെ ഒരു ഇംഗ്ലീഷ് ടെലിവിഷന് ചാനലില് ജാക്ക് തന്റെ ബൈക്ക് റൈഡിങിന്റെ കഴിവുകള് പ്രകടിപ്പിച്ചിരുന്നു. തന്റെ നൂറ്റിഒന്നാമത്തെ വയസിലാണ് ജാക്ക് പരിപാടിയില് പങ്കെടുത്തത്. '100 ഇയര് ഓള്ഡ് ഡ്രൈവിങ് സ്കൂള്' എന്നായിരുന്നു പരിപാടിയുടെ പേര്.
പഴയതും പുതിയതുമായ നിരവധി ബൈക്കുകള് ഇതിനോടകം ജാക്ക് ഓടിച്ചിട്ടുണ്ട്. ചെറുപ്പകാലത്തെ അതെ ഊര്ജ്ജം തന്നെയാണ് തനിക്ക് പ്രായമായപ്പോഴും ലഭിച്ചിരുന്നതെന്ന് ജാക്ക് വെളിപ്പെടുത്തുന്നു. തന്റെ യമഹ 125 സിസി സ്കൂട്ടറില് നഗരം ചുറ്റുന്ന തിരക്കിലായിരുന്നു ജാക്ക്. അടുത്ത വര്ഷം തന്റെ ലൈസന്സ് പുതുക്കുവാന് ആഗ്രഹിക്കുന്നതിനിടയിലാണ് ജാക്കിനെ മരണം കവര്ന്നത്.
https://www.facebook.com/Malayalivartha
