മോഷണം ഒരു കുറ്റം ആണെന്ന് എല്ലാവര്‍ക്കും അറിയാം. എന്നാല്‍ താന്‍ ചെയ്യുന്നത് മോഷണമാണെന്നോ അതൊരു കുറ്റമാണെന്നോ അറിയാത്ത ഒരാളാണ് അത് ചെയ്യുന്നതെങ്കിലോ അതൊരു കൗതുകമായിരിക്കും. അത്തരം ഒരു മോഷ്ടാവിന്റെ ദൃശ്യങ്ങളാണ് ഇപ്പോള്‍ വൈറലായിരിക്കുന്നത്.

മോഷ്ടിച്ചത് രാജ്യത്തെ രാജകുമാരന്റെ വസ്തുവാണെങ്കിലും സംഭവത്തില്‍ താരമായിരിക്കുന്നത് മോഷ്ടാവ് തന്നെയാണ്. കാരണം അത്രയ്ക്ക് വശ്യതയാണ് അവള്‍ക്ക്.

സിറ്റിങ് വോളിബോള്‍ കാണുവാന്‍ എത്തിയപ്പോഴാണ് സംഭവം. ഹാരി രാജകുമാരന്‍ കയ്യില്‍ കരുതിയിരുന്ന പോപ്‌കോണ്‍ കൊറിച്ചുകൊണ്ടാണ് കളി കണ്ടത്. എന്നാല്‍ അടുത്ത സീറ്റില്‍ അമ്മയുടെ മടിയിലിരുന്ന എമിലി ഹെന്‍സണ്‍ അതില്‍ നിന്നും പോപ്‌കോണ്‍ എടുത്തുകഴിക്കുകയായിരുന്നു.

എന്നാല്‍, അധിക നേരം നീണ്ടുനിന്നില്ല ഈ കുഞ്ഞു മോഷണം. രാജകുമാരന്‍ കൈയ്യോടെ പിടികൂടി. പിന്നീട് ഇരുവരും തമ്മില്‍ നടത്തുന്ന രസകരമായ ആശയവിനിമയവും ഏവരേയും പിടിച്ചിരുത്തുന്നതാണ്.