ശസ്ത്രക്രിയക്ക് ശേഷം മുറിവുകള്‍ ഒട്ടിച്ചുചേര്‍ക്കുന്ന പശ വികസിപ്പിച്ചെടുത്തു. നിലവില്‍ തുന്നിക്കെട്ടുന്നതും സ്‌റ്റേപ്പിള്‍ ചെയ്യുകയും ചെയ്യുന്ന രീതിക്ക് പകരമാണ് ആസ്‌ട്രേലിയന്‍ ശാസ്ത്രജ്ഞര്‍ പശ വികസിപ്പിച്ചത്. മിനിറ്റുകള്‍ക്കകം മുറിവ് കൂടിച്ചേരുന്ന രീതിയിലാണ് പശയുടെ പ്രവര്‍ത്തനം. സിഡ്‌നി സര്‍വ്വകലാശാലയിലെയും അമേരിക്കയിലെയും ബയോമെഡിക്കല്‍ രംഗത്തെ വിദഗ്ധരാണ് മെട്രോ എന്ന പേരില്‍ സര്‍ജിക്കല്‍ പശ വികസിപ്പിച്ചത്.

മെട്രോയുടെ ഉയര്‍്ന്ന ഇലാസ്തിക സ്വഭാവം മുറിവ് ഉണക്കുന്നതിനും ആവശ്യാനുസരണം വീണ്ടും തുറക്കുന്നതിനും സഹായകമാണെന്നാണ് വിദഗ്ധ സംഘം പറയുന്നത്. ശരീരത്തിലെ ആന്തരിക മുറിവുകളിലും ഇതുപയോഗിക്കാനാകും. അള്‍ട്രാവയലറ്റ് ലൈറ്റിന്റെ സഹായത്തോടെയാണ് പശ ശരീരത്തില്‍ ഉപയോഗിക്കുക. പശ ഉപയോഗിച്ച് 60 സെക്കന്റ് കൊണ്ട് മുറിവ് കൂടിച്ചേരും. മുറിവ് ഉണങ്ങാന്‍ സഹായിക്കുന്ന എന്‍സൈമുകളില്‍ ഭ്രംശം വരുത്തിയാണ് പശ പ്രവര്ത്തിക്കാനുള്ള സാഹചര്യമൊരുക്കുന്നത്.

ദ്രവ/ ജെല്‍ രൂപത്തിലുള്ള പശ പെട്ടെന്ന് കൂടിച്ചേരാന്‍ സഹായിക്കും. ഹൃദയപേശികളിലും ശ്വാസകോശത്തിലും ശസ്ത്രക്രിയക്ക് വേണ്ടിയുണ്ടാക്കുന്ന മുറിവുകള്‍ തുന്നലോ സ്‌റ്റേപ്പിളോ കൂടാതെ കൂടിച്ചേരാനും ഇവ സഹായിക്കുന്നു. ഗവേഷണ ഫലം സയന്‍സ് ട്രാന്‍സ്ലേഷണല്‍ മെഡിസിന്‍ എന്ന ജേണലില്‍ പ്രസിദ്ധീകരിച്ചിട്ടുണ്ട്. സിഡ്‌നി സര്‍വ്വകലാശാല, ബോസ്റ്റണ്‍ നോര്‍ത്ത് ഈസ്‌റ്റേണ്‍ സര്‍വ്വകലാശാല എന്നിവിടങ്ങളിലെ ബയോമെഡിക്കല്‍ വിദഗ്ധരാണ് ഹാര്‍വാര്‍ഡ് സര്‍വ്വകലാശാലയുടെ സഹായത്തോടെ ഈ നേട്ടത്തിലെത്തിയത്.