കല്യാണ വീഡിയോകള്‍ പലതരത്തില്‍ എഡിറ്റ് ചെയ്തും ഗ്രാഫിക്‌സ് കൊണ്ട് അടിപൊളിയാക്കിയും സോഷ്യല്‍ മീഡിയയിലൂടെ വൈറലാക്കാറുമുണ്ട്. മാത്രമല്ല കല്യാണം എന്ന് പറഞ്ഞാല്‍ അത് വധൂവരന്മാരുടെ മാത്രം ആഘോഷമല്ല, മറിച്ച് ഫോട്ടോഗ്രഫറുടെയും കൂടി ആഘോഷമായി മാറിയിട്ടുണ്ട്. കാരണം ആ ദിവസം അവരെ കൊണ്ട് എന്തൊക്കെ കാണിച്ച് കൂട്ടാമോ അതൊക്കെ ഫോട്ടോഗ്രഫര്‍ ചെയ്ത് കൂട്ടും. ഫോട്ടോഗ്രഫര്‍ പറയുന്നതനുസരിച്ച് ചിരിയ്ക്കുക, പോസ് ചെയ്യുക തുടങ്ങിയവയൊക്കെ കാണിക്കേണ്ടി വരും.

എന്നാല്‍ വളരെ വ്യത്യസ്തമായ ഒരു പുതിയ വീഡിയോ ഇറങ്ങിയിരിക്കുന്നു. കഴിഞ്ഞ വര്‍ഷം പാകിസ്താനില്‍ നിന്നുള്ള ഒരു വിവാഹ വീഡിയോ വരന്‍ മണ്ഡപത്തിലേക്ക് വരുന്നത് വളരെയധികം വൈറലായി മാറിയിരുന്നു. ട്രിപ്പിള്‍ എച്ച് എന്‍ട്രിയിലൂടെയാണ് അന്ന് വരന്‍ മണ്ഡപത്തിലേക്ക് വന്നത്. റെസ്‌ലിങ് താരം അണ്ടര്‍ ടെയ്ക്കര്‍ സ്‌റ്റൈലില്‍ വന്ന് ആളുകളെ ഞെട്ടിച്ചിരിക്കുകയാണ് വരനും കൂട്ടരും.

തികച്ചും നാടകീയമായിരുന്നു നടന്റെ വരവ്. ശ്മശാന മൂകത, കൂരാകൂരിരുട്ട്, പെട്ടെന്ന് എല്ലാവരേയും ഞെട്ടിച്ച് മ്യൂസിക്, അതിനു തൊട്ടു പിന്നാലെ കറുത്ത വസ്ത്രവും ധരിച്ച് വരന്‍ പതുക്കെ മണ്ഡപത്തിലേക്ക് വരുന്നതാണ് വീഡിയോ. കൈയ്യില്‍ റെസലിങ് താരം ഉപയോഗിക്കുന്ന വലിയൊരു ബെല്‍റ്റുമുണ്ട്. ഒരു മാസ് എന്‍ട്രി തന്നെയാണ് വരന്‍ നടത്തിയിരിക്കുന്നത്. എന്തു തന്നെയായലും ജീവിതത്തില്‍ ഒരിക്കലും മറക്കാനാവാത്ത ഒരു വിവാഹമായിരിക്കും ഇരുവരുടേതും.