കത്തുന്ന വിവാദങ്ങള്‍ക്കിടയില്‍ ഹിന്ദുമത നേതാവ് ശശികല ടീച്ചര്‍ക്ക് വിസ കിട്ടിയതായി റിപ്പോര്‍ട്ട്. ഇംഗ്ലണ്ടിലെ ക്രോയ്‌ഡോണില്‍ മെയ് രണ്ടിന് നടക്കേണ്ടിയിരുന്ന ഹിന്ദുമത കണ്‍വെന്‍ഷനില്‍ പങ്കേടുക്കാനായുള്ള വിസയാണ് നേരത്തെ നിരസിച്ചത്. ഇത് ഏറെ വിവാദമുണ്ടാക്കിയിരുന്നു. അവസാനം ശശികല ടീച്ചര്‍ക്കും എന്‍.ഗോപാലകൃഷ്ണനും ബ്രിട്ടീഷ് എംബസ്സി വിസ നല്‍കി. ഇരുവരും എത്താതിരുന്നതിനെത്തുടര്‍ന്ന് മാറ്റിവെയ്ക്കപ്പെട്ട കണ്‍വെന്‍ഷന്‍ പുതിയ തീയതിയില്‍ നടത്താന്‍ ഒരുങ്ങുകയാണ് സംഘാടകര്‍.
തീവ്ര ഹിന്ദു നിലപാടുകള്‍ പ്രസംഗിക്കുന്നതിലൂടെ വിവാദ നായികയായി മാറിയ ശശികല ടീച്ചര്‍ക്കും എന്‍.ഗോപാലകൃഷ്ണനും ജനുവരി 29 മുതല്‍ ആറുമാസത്തേയ്ക്കാണ് വിസയെന്നാണ് അറിയുന്നത്. വിസ അനുവദിച്ചിരുന്നെങ്കിലും ചില കേന്ദ്രങ്ങളില്‍നിന്ന് പരാതിയുയര്‍ന്നതിനെത്തുടര്‍ന്ന് എംബസ്സി പാസ്‌പോര്‍ട്ട് പിടിച്ചുവെയ്ക്കുകയായിരുന്നു.
ഇരുവരെയും കുറിച്ചുള്ള അന്വേഷണം പൂര്‍ത്തിയാക്കുന്നതിനുള്ള കാലതാമസം കൊണ്ടാണ് പാസ്‌പോര്‍ട്ട് തിരികെ നല്‍കാതിരുന്നതാണെന്നാണ് റിപ്പോര്‍ട്ട്. ശശികലയും ഗോപാലകൃഷ്ണനും ബ്രിട്ടനില്‍ എത്തി പ്രസംഗിക്കുന്നതിനെതിരെ ചില സംഘടനകള്‍ ബ്രിട്ടീഷ് എംബസിക്കും ഹോം ഓഫീസിനും പരാതിനല്‍കുകയായിരുന്നു. ഇവര്‍ വരുന്നത് സാമുദായിക സ്പര്‍ധ വളര്‍ത്തുമെന്ന് കാണിച്ചാണ് പരാതി നല്‍കിയിരുന്നത്.
ഇരുവര്‍ക്കും വിസ നിഷേധിച്ചുവെന്ന റിപ്പോര്‍ട്ട് ഇതിനിടെ പുറത്തുവന്നിരുന്നു. ഇത് പ്രതിഷേധത്തിനുമിടയാക്കി. എന്നാല്‍, വിസ നിഷേധിക്കപ്പെട്ടിട്ടില്ലെന്ന് എംബസിയുമായി ബന്ധപ്പെട്ട കേന്ദ്രങ്ങള്‍ സൂചിപ്പിക്കുന്നു. പരിശോധനകള്‍ പൂര്‍ത്തിയാകുംവരെ പാസ്‌പോര്‍ട്ട് പിടിച്ചുവെയ്ക്കുക മാത്രമാണ് ഉണ്ടായത്. വിസ അനുവദിച്ചതോടെ, ശശികല ടീച്ചറും ഗോപാലകൃഷ്ണനും ഹിന്ദു മത കണ്‍വെന്‍ഷനായി ബ്രിട്ടനിലേക്ക് പോകും. കണ്‍വെന്‍ഷന്റെ പുതിയ തീയതി പ്രഖ്യാപിച്ചിട്ടില്ല.
ശശികലക്ക് ആദ്യം വിസ അനുവദിച്ച ശേഷം പിന്നീടു ചെന്നൈയിലെ എംബസി അധികൃതര്‍ തിരിച്ചെടുക്കുക ആയിരുന്നു. ശശികല വരുന്നത് സംബന്ധിച്ച് പ്രതിഷേധം ശക്തമായ സാഹചര്യത്തില്‍ അവരെ ഒഴിവാക്കി പരിപാടി നടത്തുന്നത് സംബന്ധിച്ച് ചില ചര്‍ച്ചകള്‍ ഉയര്‍ന്നിരുന്നെങ്കിലും സംഘാടകര്‍ അതിന് തയ്യാറായില്ല. 
എന്നാല്‍ ശശികലയെ എത്തിക്കാനുള്ള നീക്കം സംഘാടകര്‍ ഉപേക്ഷിക്കുന്നില്ലെന്നു വ്യക്തമാക്കിയപ്പോള്‍ ക്രോയിഡോണ്‍ കേന്ദ്രീകരിച്ചു ഒരു സംഘം ആളുകള്‍ പ്രധാനമന്ത്രി ഡേവിഡ് കാമറോണ്‍, ഹോം സെക്രട്ടറി തെരേസ മേ, ഹോം ഓഫീസ്, ബോര്‍ഡര്‍ ഏജന്‍സി, പരിപാടി നടക്കാനിരുന്ന ക്രോയിഡോണ്‍ ലങ്ഗ് ഫ്രാക് സ്‌കൂള്‍ അധികൃതര്‍, ലണ്ടനിലെ ഇന്ത്യന്‍ എംബസി എന്നിവര്‍ക്ക് പരാതി നല്‍കി. 
ഇത് വലിയ ചര്‍ച്ചകള്‍ക്ക് തുടക്കം കുറിച്ചു. യൂടുബില്‍ വിമര്‍ശനവുമായി ഗോപാലകൃഷ്ണനും അതിന് മറുപടിയുമായി ജയ്പ്രകാശ് പണിക്കറുമെത്തി. ഇതിനിടെ ഹിന്ദുമത പരിഷത്ത് ചരട് വലികളുമായി സജീവവുമായി. അവസാനം ഉന്നത കേന്ദ്രത്തില്‍ നിന്നുള്ള ഇടപെടലുകളും സജീവമായി. അങ്ങനെ എല്ലാം വിജയം കണ്ടു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha