ബിഗ്ഗ്‌ബോസ് മലയാളം സീസൺ 4 വളരെ ഗംഭീരമായി മുന്നേറുകയാണ്. ഇതിനിടെ രസകരമായ കാഴ്ചകൾക്കൊപ്പം തന്നെ ഏറെ നിരാശപ്പെടുത്തുന്ന സംഭവങ്ങളും ഉണ്ടായി. ഇപ്പോഴിതാ ദിൽഷാ ബ്ലെസ്ലി ബന്ധത്തെക്കുറിച്ചുള്ള ചർച്ചകളും ഇതിലെ കാഴ്ചകളുമാണ് ഇപ്പോൾ ശ്രദ്ധേയമാകുന്നത്. ഇതിനെകുറിച്ച് തന്റെ കാഴ്ചപ്പാട് പങ്കുവയ്ക്കുകയാണ് ജോമോൾ ജോസഫ്.

'ഈ ചെക്കൻ പ്രണയം പറഞ്ഞപ്പോൾ ആ പ്രണയം അവൾ നിരസിക്കുകയും നീ എന്നേക്കാൾ വളരെ ഇളയതാണ്, നീ എനിക്ക് അനിയനെ പോലെയാണ് എന്ന് പറഞ്ഞു സൗഹൃദം സൂക്ഷിക്കാൻ ആഗ്രഹിക്കുകയും ചെയ്ത പെണ്ണിനെ നിരന്തരം പുറകെ നടന്ന് ശല്യം ചെയ്യുകയും അവളുടെ ലൈംഗീകാവായങ്ങളുടെ ഭാഗത്തും ശരീരത്തിലും ഒക്കെ തരം കിട്ടുമ്പോൾ കയറിപ്പിടിക്കുകയും ചെയ്യുകയാണ് ഈ നാറി' എന്നാണ് ബ്ലെസ്ലിയെ രൂക്ഷമായി വിമർശിക്കുന്നത്.

ഫേസ്ബുക്ക് കുറിപ്പ് ഇങ്ങനെ;

#Pervert അഥവാ #ഞരമ്പൻ നടത്തുന്ന സ്ത്രീകൾക്കെതിരായ കടന്നുകയറ്റം..
ഈ വാക്ക് പലപ്പോഴും നമ്മൾ കേട്ടിട്ടുണ്ട് എങ്കിലും അതിന്റെ അർത്ഥതലം ശരിയായ രീതിയിൽ ഉൾക്കൊണ്ടിട്ടുണ്ടോ എന്നത് സംശയമാണ്.

Pervert : a person whose sexual behaviour is regarded as abnormal and unacceptable.
ഒരു വ്യക്തിയുടെ പെരുമാറ്റം ലൈംഗീകമായി നോർമൽ അല്ലാതിരിക്കുകയോ, നമുക്ക് അംഗീകരിക്കാൻ കഴിയാതിരിക്കുകയോ ചെയ്യുന്നു എങ്കിൽ എന്ന് മലയാളത്തിൽ പറയാം. Pervert എന്ന വാക്കിന്റെ മലയാളം ആണ് ഞരമ്പൻ ഏതൊരു ജീവജാലങ്ങൾക്കും ലൈംഗീകമായ താല്പര്യങ്ങൾ ഉണ്ട്. മനുഷ്യന് പ്രത്യേകിച്ചും. ആ ലൈംഗീകമായ താല്പര്യങ്ങളുടെ തുടക്കമാണ് ഇണയെ ആകർഷിക്കുകയോ ഇണയോട് താല്പര്യം തോന്നുകയോ ഒക്കെ ചെയ്യുക എന്നത്. ഈ ഘട്ടത്തെ പ്രണയം എന്ന് പറയാം.

ഒരു വ്യക്തിക്ക് മറ്റൊരു വ്യക്തിയോട് പ്രണയം തോന്നുകയോ അത് അവരെ അറിയിക്കുകയോ ചെയ്യുന്നതിൽ തെറ്റില്ല. എന്നാൽ താൻ പ്രണയം അറിയിച്ച വ്യക്തിക്ക് താല്പര്യം ഇല്ല എന്ന് പറഞ്ഞാലോ, തോന്നിയാലോ പിന്നീട് ശല്യം ചെയ്യാതിരിക്കുക എന്നതാണ് മര്യാദ. അതിനുമപ്പുറം അവരുടെ ബൗണ്ടറികൾ ലംഘിച്ചു കൊണ്ട് അവരുടെ ശരീരത്തിൽ കടന്നു പിടിക്കുക, തൊടുക, ഉമ്മ വെക്കാൻ ചെല്ലുക, ചന്തിക്ക് പിടിക്കുക, കാലുകൊണ്ട് തടവുക, ലൈംഗീക അവയവങ്ങളിൽ കടന്നു പിടിക്കുക എന്നതൊക്കെ ആ സ്ത്രീക്ക് നേരെ നടക്കുന്ന കടന്നുകയറ്റം തന്നെയാണ്. Atrocities against women എന്ന ക്രിമിനൽ കുറ്റകൃത്യത്തിൽ പെടുന്ന ക്രിമിനൽ പ്രവർത്തികളാണ് ഇതൊക്കെ തന്നെയും. പ്രണയം നിരസിച്ച പെണ്ണിനെ പിന്തുടർന്ന് ശല്യം ചെയ്യുന്നതും ക്രിമിനൽ കുറ്റകൃത്യം തന്നെയാണ്.

വീടുകളിൽ, റോഡുകളിൽ, വിദ്യാലയങ്ങളിൽ, പൊതുഗതാഗത സംവിധാനങ്ങളിൽ, സിനിമ തീയേറ്ററുകളിൽ പാർക്കുകളിൽ ബീച്ചുകളിൽ അങ്ങനെ ആളുകൾ കൂടുന്നിടത്ത് മുഴുവനും ഇത്തരം കടന്നുകയറ്റങ്ങൾ പെൺകുട്ടികളും സ്ത്രീകളും നേരിടുന്നുണ്ട്. "ഇല വന്ന് മുള്ളിൽ വീണാലും മുള്ളു വന്ന് ഇലയിൽ വീണാലും ഇലക്കാണ്" ദോഷം എന്ന് പറഞ്ഞു പഠിപ്പിച്ച നമ്മുടെ സാമൂഹ്യ പൊതുബോധത്തിൽ പ്രതികരിക്കുന്ന സ്ത്രീകൾ മോശക്കാരായി മാറും എന്ന പേടിയിൽ പല സ്ത്രീകളും ഇതിനെതിരെ പ്രതികരിക്കാൻ മടി കാണിക്കുന്നവരാണ്.

നോക്കൂ ഈ വിഡിയോകളിൽ, ഈ ചെക്കൻ പ്രണയം പറഞ്ഞപ്പോൾ ആ പ്രണയം അവൾ നിരസിക്കുകയും നീ എന്നേക്കാൾ വളരെ ഇളയതാണ്, നീ എനിക്ക് അനിയനെ പോലെയാണ് എന്ന് പറഞ്ഞു സൗഹൃദം സൂക്ഷിക്കാൻ ആഗ്രഹിക്കുകയും ചെയ്ത പെണ്ണിനെ നിരന്തരം പുറകെ നടന്ന് ശല്യം ചെയ്യുകയും അവളുടെ ലൈംഗീകാവായങ്ങളുടെ ഭാഗത്തും ശരീരത്തിലും ഒക്കെ തരം കിട്ടുമ്പോൾ കയറിപ്പിടിക്കുകയും ചെയ്യുകയാണ് ഈ നാറി. അവൾക്ക് കൂടി സമ്മതമാണ് എങ്കിൽ ഇതിലൊന്നും നമ്മൾ അഭിപ്രായം പോലും പറയുന്നത് ശരിയല്ല.

എന്നാൽ നോക്കൂ, ഓരോ തവണയും ആ പെണ്ണ് അതിൽ നിന്നും ഒഴിഞ്ഞു മാറുകയാണ്. ഈ ഒഴിഞ്ഞു മാറ്റം പോലും ഇൻവിറ്റേഷൻ ആയി അവൻ പരിഗണിക്കുകയും, വീണ്ടും വീണ്ടും അവസരങ്ങൾക്കായി കാത്തിരിക്കുകയും ചെയ്യുന്നു. വീണുകിട്ടുന്ന അവസരങ്ങൾ അവൻ കാത്തുനിന്ന് ഉപയോഗപ്പെടുത്തുന്നു. ഇവിടെ ശക്തമായി പ്രതികരിക്കാനോ അവനെ നിലക്ക് നിർത്താനോ അവൾക്ക് കഴിയുന്നില്ല എന്നതാണ് സത്യം. അവനെതിരെ പ്രതികരിച്ചാൽ അവൻ പുറത്തു പോകേണ്ടി വരികയും, അവന്റെ ആരാധകർ അവൾക്കെതിരാകുകയും ചെയ്യുമെന്നോ, അത് അവളുടെ വിജയ സാധ്യത കുറക്കുമെന്നോ അവൾ ഭയപ്പെടുന്നുണ്ടാകാം. അവന്റെ ഇത്തരം കടന്നു കയറ്റങ്ങൾക്കെതിരെ bigboss ടീമിനോട് ക്യാമെറക്ക് മുന്നിൽ ചെന്ന് നിന്ന് അവൾ ഒരു പരാതി പറഞ്ഞാൽ ശക്തമായ നടപടി അവനെതിരെ ഉണ്ടാകുകയും അവൾ സുരക്ഷിത ആയിരിക്കുകയും ചെയ്തേനെ ആ വീട്ടിൽ. എന്നാൽ അതിനുള്ള ധൈര്യമോ കഴിവൊ ആ പെണ്ണിന് ഇല്ലാതെ പോയി. ഇത് തന്നെയാണ് മിക്ക സ്ത്രീകളും നേരിടുന്ന പ്രശ്നം.

ഈ ചെറുക്കൻ ഒരു ലൈംഗീക കുറ്റവാളിയാണ്, കുറ്റകൃത്യം ആവർത്തിച്ചു ചെയ്യാനുള്ള വാസനയും അവനിലുണ്ട്. ഇവൻ അവിടെ നിൽക്കുന്ന ഓരോ നിമിഷവും ഈ നാട്ടിലെ യുവതക്ക് മോശം സന്ദേശമാണ് ലഭിക്കുന്നത്. അതോടൊപ്പം തന്നെ അവളും സമൂഹത്തിന് ഒരിക്കലുമൊരു നല്ല മാതൃകയല്ല. ഇത്തരം ഞരമ്പന്മാർ തന്നെയാണ് പ്രണയം നിരസിച്ച പെണ്ണിനെ കൊല്ലാൻ നടക്കുന്നതും, ആക്രമിക്കുന്നതും ഒക്കെ. ഇത്തരം ക്രിമിനലുകളെ നിലക്ക് നിർത്തിയെ മതിയാകൂ. ഇത്തരം ക്രിമിനലുകൾക്ക് സമൂഹത്തിൽ ലഭിക്കുന്ന സ്വീകാര്യതയെ നമ്മൾ ഭയപ്പെട്ടെ മതിയാകൂ. ആരൊക്കെ എന്തൊക്കെ പറഞ്ഞാലും ഞാനിതു തന്നെ തുടരും എന്ന് നെഞ്ച് വിരിച്ച് നിന്ന് പറയുന്നവൻ തനി ക്രിമിനൽ ആണ്. നോ ഡൌട്ട്.. നോ പറയേണ്ടിടത്ത് നോ പറയാനും, കടന്നുകയറ്റത്തിനെതിരെ പ്രതികരിക്കാനും നമ്മുടെ പെൺകുട്ടികളെ പഠിപ്പിക്കുന്നതിനൊപ്പം, സ്ത്രീകളോട് എങ്ങനെ പെരുമാറണം എന്ന് നമ്മുടെ ആൺകുട്ടികളെയും പഠിപ്പിക്കേണ്ടതുണ്ട്.