ഇംഗ്ലണ്ട് അണ്ടര്‍ 19 ടീമിനെതിരായ അഞ്ചാം ഏകദിനത്തില്‍ ഇന്ത്യ അണ്ടര്‍ 19 ടീമിന് ഏഴ് വിക്കറ്റിന്റെ തോല്‍വി. 50 ഓവറില്‍ ഒമ്പത് വിക്കറ്റ് നഷ്ടത്തില്‍ 209 റണ്‍സാണ് ഇന്ത്യയുടെ കൗമാര പട നേടിയത്.

113 പന്തുകള്‍ ബാക്കി നില്‍ക്കെ മൂന്ന് വിക്കറ്റുകള്‍ നഷ്ടത്തില്‍ ഇംഗ്ലണ്ട് കൗമാരപട അത് മറികടക്കുകയും ചെയ്തു.ടോസ് നേടി ബാറ്റിംഗ് തിരഞ്ഞെടുത്ത ഇന്ത്യയ്ക്ക് വേണ്ടി മുന്‍ നിരയില്‍ വൈഭവ് സൂര്യവംശി മാത്രമാണ് തിളങ്ങിയത്.

42 പന്തില്‍ രണ്ട് സിക്സറും മൂന്ന് ഫോറുകളും അടക്കം താരം 33 റണ്‍സ് നേടി. കഴിഞ്ഞ മത്സരത്തില്‍ താരം വെടിക്കെട്ട് സെഞ്ച്വറി നേടിയിരുന്നു. അതിന് മുമ്പുള്ള മൂന്ന് മത്സരങ്ങളിലും താരം മികച്ച പ്രകടനം കാഴ്ച വെച്ചിരുന്നു.

ഇന്നത്തെ മത്സരത്തില്‍ വൈഭവിനെ കൂടാതെ മധ്യനിരയില്‍ ആര്‍ എസ് അംബ്രിഷ് മാത്രമാണ് തിളങ്ങിയത്. താരം 81 പന്തില്‍ ആറുഫോറുകള്‍ അടക്കം 66 റണ്‍സ് നേടി, ഇംഗ്ലണ്ടിന് വേണ്ടി എഎം ഫ്രഞ്ച്, റാല്‍ഫി ആര്‍ബര്‍ട്ട് എന്നിവര്‍ രണ്ട് വിക്കറ്റ് വീതം വീഴ്ത്തി.മറുപടി ബാറ്റിങ്ങില്‍ ഇംഗ്ലണ്ടിന് വേണ്ടി ബെന്‍ ഡോക്കിന്‍സ് 66 റണ്‍സും ബെന്‍ മെയ്സ് 82 റണ്‍സും തോമസ് റെവ് 49 റണ്‍സും നേടി. തോറ്റെങ്കിലും അഞ്ചുമത്സരങ്ങളുടെ പരമ്പര 3-2 ന് സ്വന്തമാക്കി ഇന്ത്യ.