ഫാഫ് ഡുപ്ലേസി തോല്വിക്കു കാരണമായി ഉയര്ത്തിക്കാട്ടിയ ന്യായീകരണത്തിനെതിരെ ഇന്ത്യന് ആരാധകര്
സമ്പൂര്ണ പരാജയം ഏറ്റുവാങ്ങി നാട്ടില് തിരിച്ചെത്തിയതിനു പിന്നാലെ ദക്ഷിണാഫ്രിക്കന് നായകന് ഫാഫ് ഡുപ്ലേസി തോല്വിക്കു കാരണമായി ഉയര്ത്തിക്കാട്ടിയ ന്യായീകരണത്തിനെതിരെ ഇന്ത്യന് ആരാധകര്. തോല്വിയുടെ കാരണം വിശദീകരിച്ച ഫാഫ്, ടോസിന്റെ പ്രാധാന്യം എടുത്തുപറഞ്ഞ് നടത്തിയ പരാമര്ശമാണ് ഇന്ത്യന് ആരാധകര്ക്ക് ദഹിക്കാതെ പോയത്. ടോസിനെ കുറ്റപ്പെടുത്തി ഡുപ്ലേസി നടത്തിയ വിശദീകരണത്തിന് 'ട്രോള്മഴ' തീര്ത്താണ് ആരാധകരുടെ മറുപടി. നാട്ടില് തിരിച്ചെത്തിയ ശേഷം മാധ്യമങ്ങളോടു സംസാരിക്കവെ ഡുപ്ലേസി നടത്തിയ നിരീക്ഷണം ഇങ്ങനെ:
'എല്ലാ ടെസ്റ്റിലും അവര് (ഇന്ത്യന് ടീം) ആദ്യം ബാറ്റ് ചെയ്യും. 500 റണ്സ് നേടും. എന്നിട്ട് ഇരുട്ടു വീഴുമ്പോള് ഡിക്ലയര് ചെയ്യും. ഇരുട്ടിന്റെ മറവില് അന്നത്തെ കളി തീരും മുന്പ് മൂന്നു വിക്കറ്റും വീഴ്ത്തും. മൂന്നാം ദിനം കളി പുനഃരാരംഭിക്കുമ്പോള് സ്വാഭാവികമായും ഞങ്ങള് കടുത്ത സമ്മര്ദ്ദത്തിലായിരിക്കും' - ഡുപ്ലേസി ചൂണ്ടിക്കാട്ടി.
'ടെസ്റ്റ് മത്സരങ്ങളില് സന്ദര്ശക ടീമിന് ടോസ് നല്കുന്ന രീതിയില് ക്രമീകരണം വന്നാല് മത്സരം കൂടുതല് ആവേശകരമാകും എന്നാണ് എനിക്കു തോന്നുന്നത്. അങ്ങനെ വരുമ്പോള് സന്ദര്ശക ടീമിനും മത്സരത്തില് എന്തെങ്കിലും സാധ്യതയുണ്ടാകും. എല്ലാ മത്സരങ്ങളിലും ഇന്ത്യ 'കോപ്പി, പേസ്റ്റ്' രീതിയിലാണ് ഇത് ആവര്ത്തിച്ചത്. ദക്ഷിണാഫ്രിക്കന് മണ്ണില് ടോസ് ആര്ക്കു ലഭിക്കും എന്നത് എന്നെ സംബന്ധിച്ച് ഒരു വിഷയമേ അല്ല. അവിടെ പച്ചപ്പുല്ലിലാണ് എപ്പോഴും നമ്മുടെ ബാറ്റിങ്' - ഡുപ്ലേസി ചൂണ്ടിക്കാട്ടി.
ആദ്യ രണ്ടു ടെസ്റ്റുകളില് ടോസ് നഷ്ടമായതോടെ റാഞ്ചിയില് നടന്ന മൂന്നാം ടെസ്റ്റില് 'ഭാഗ്യം' പരീക്ഷിക്കാന് ഡുപ്ലേസി സഹതാരം തെംബ ബാവുമയെയാണ് നിയോഗിച്ചത്. ഏഷ്യന് മണ്ണില് തുടര്ച്ചയായി ഒന്പതു മത്സരങ്ങളില് ടോസ് നഷ്ടമായ സാഹചര്യത്തിലാണ് റാഞ്ചിയില് ബാവുമ ടോസിനെത്തിയത്. എന്നാല്, ഭാഗ്യം ഇന്ത്യന് നായകനൊപ്പമായിരുന്നു. തുടര്ച്ചയായ മൂന്നാം ടെസ്റ്റിലും ടോസ് നേടിയത് കോലി തന്നെ. അതേസമയം, സഹതാരത്തെ ടോസിന് അയച്ച ഡുപ്ലേസിയുടെ നീക്കത്തെ രൂക്ഷമായ ഭാഷയില് വിമര്ശിച്ച് മുന് ദക്ഷിണാഫ്രിക്കന് നായകന് കൂടിയായ ഗ്രെയിം സ്മിത്ത് രംഗത്തെത്തിയിരുന്നു.
വിരാട് കോലിയും സംഘവും നേടിയ ആധികാരിക വിജയത്തിന്റെ ശോഭ കെടുത്താനുള്ള ശ്രമമാണ് ഡുപ്ലേസി നടത്തുന്നത് എന്ന രീതിയിലാണ് ആരാധകരില് ഒരു വിഭാഗം ഈ കമന്റുകളോട് പ്രതികരിച്ചത്. പരമ്പര തോറ്റതിനു പിന്നാലെ ഡുപ്ലേസി അനാവശ്യ ന്യായങ്ങള് കണ്ടെത്താനുള്ള തീവ്ര ശ്രമത്തിലാണെന്നും ആരാധകര് വിമര്ശിച്ചു.
'ഡുപ്ലെസിയെ കടുത്ത ഭാഷയില് വിമര്ശിക്കണമെന്നുണ്ട്. എങ്കിലും എന്റെയുള്ളിലെ ചെന്നൈ സൂപ്പര് കിങ്സ് ഫാന് അതില്നിന്ന് എന്നെ തടയുന്നു' എന്നായിരുന്നു മറ്റൊരു ആരാധകന്റെ പ്രതികരണം. 'ഒന്നു പൊട്ടിക്കരഞ്ഞുകൂടേ' എന്ന് ഒരു ആരാധകന് പരിഹസിച്ചപ്പോള്, 'നിര്ത്താമോ' എന്ന ചോദ്യമുയര്ത്തിയാണ് വേറൊരാള് വിമര്ശനം കടുപ്പിച്ചത്.
കുറച്ചുകൂടി ആഴത്തില് ഇഴകീറി പരിശോധിച്ച് ദക്ഷിണാഫ്രിക്കയുടെ തോല്വിയുടെ കാരണം 'കണ്ടെത്തിയ' ആരാധകനുമുണ്ട്. അദ്ദേഹം കുറിച്ചത് ഇങ്ങനെ:
'നോക്കൂ, ഈ മനസ്ഥിതിയുള്ളയാളാണ് ക്യാപ്റ്റനെങ്കില് ആ ടീം തിരിച്ചുവരുമെന്ന് പ്രതീക്ഷിക്കരുത്. അതു സംഭവിക്കില്ലെന്ന് തീര്ച്ചയാണ്. ലോകകപ്പില് നാം കണ്ടതാണ്. സമാനമായ പ്രകടനം ഇന്ത്യന് പര്യടനത്തിലും കണ്ടു. ദക്ഷിണാഫ്രിക്കന് പര്യടനത്തിലെ ആദ്യ രണ്ടു ടെസ്റ്റുകള്ക്കു ശേഷം ഇന്ത്യന് ടീമിനായി കോലി ചെയ്തതാണ് ഇവിടെ ഫാഫും ചെയ്യേണ്ടിയിരുന്നത്. അല്ലാതെ തൊടുന്യായങ്ങള് പടച്ചുവിടുകയല്ല.'
'തോല്വിക്ക് മണ്ടന് ന്യായങ്ങള് കണ്ടെത്തുന്ന പരിപാടി ഡുപ്ലേസി നിര്ത്തിയെന്നാണ് കരുതിയതെങ്കില് നിങ്ങള്ക്കു തെറ്റി. അദ്ദേഹം ഇപ്പോഴും തൊടുന്യായങ്ങള് കണ്ടെത്തിക്കൊണ്ടിരിക്കുന്നു. അപലപനീയം' - എന്ന കമന്റോടെയാണ് ഒരു ആരാധകന് ഡുപ്ലേസിയുടെ വാക്കുകള് സമൂഹമാധ്യമത്തില് പങ്കുവച്ചത്.
https://www.facebook.com/Malayalivartha
