ബംഗ്ലദേശ് ഓള്‍റൗണ്ടര്‍ ഷാക്കിബ് അല്‍ ഹസന്‍, ഉടന്‍ ആരംഭിക്കുന്ന ഇന്ത്യന്‍ പര്യടനത്തില്‍ ബംഗ്ലദേശ് ടീമിനെ നയിക്കാനുണ്ടാകില്ലെന്ന് റിപ്പോര്‍ട്ട്. മൂന്നു ട്വന്റി20 മത്സരങ്ങളും രണ്ടു ടെസ്റ്റുകളും ഉള്‍പ്പെടുന്ന പരമ്പരയ്ക്ക്, വേതന വര്‍ധനയുള്‍പ്പെടെ വിവിധ ആവശ്യങ്ങളുയര്‍ത്തിയുള്ള താരങ്ങളുടെ സമരം നയിച്ച ഷാക്കിബ് ഉണ്ടാകില്ലെന്ന് ക്രിക്ബസ്സാണ് റിപ്പോര്‍ട്ട് ചെയ്തത്. നവംബര്‍ മൂന്നിന് പര്യടനത്തിലെ ആദ്യ ട്വന്റി20 ഡല്‍ഹിയില്‍ നടക്കാനിരിക്കെയാണ് ഷാക്കിബ് ടീമിലുണ്ടാകില്ലെന്ന വിവരം പുറത്താകുന്നത്.

ഇന്ത്യന്‍ പര്യടനത്തിനു മുന്നോടിയായുള്ള തയാറെടുപ്പുകള്‍ക്കായി സംഘടിപ്പിച്ച ക്യാംപില്‍ ഒരേയൊരു നെറ്റ് സെഷനില്‍ മാത്രമാണ് ഷാക്കിബ് പങ്കെടുത്തത്. ഇതോടെയാണ് താരം പരമ്പരയ്ക്കുണ്ടാകില്ലെന്ന് വ്യക്തമായത്. താരം ടീമിലുണ്ടാകില്ലെന്ന അഭ്യൂഹങ്ങള്‍ക്ക് കരുത്തുപകര്‍ന്ന് ഇന്ത്യന്‍ പര്യടനത്തിന് 'പുതിയ ടീമിനെ' പ്രഖ്യാപിക്കുമെന്ന് ബംഗ്ലദേശ് ക്രിക്കറ്റ് ബോര്‍ഡ് അറിയിച്ചിട്ടുണ്ട്. ടെസ്റ്റ് ടീമിനെ രണ്ടു മൂന്നു ദിവസത്തിനുള്ളില്‍ പ്രഖ്യാപിക്കുമെന്നാണ് അറിയിപ്പ്. ബംഗ്ലദേശിന്റെ ട്വന്റി20, ടെസ്റ്റ് ടീമുകളുടെ നായകനാണ് ഷാക്കിബ് അല്‍ ഹസ്സന്‍.

അതേസമയം, രാജ്യാന്തര ക്രിക്കറ്റ് കൗണ്‍സിലിന്റെ (ഐസിസി) നിര്‍ദ്ദേശപ്രകാരമാണ് ഷാക്കിബിനെ പരിശീലന ക്യാംപില്‍ പങ്കെടുപ്പിക്കാത്തതെന്നാണ് ബംഗ്ലദേശ് മാധ്യമങ്ങള്‍ റിപ്പോര്‍ട്ട് ചെയ്യുന്നത്. ഏതാനും വര്‍ഷങ്ങള്‍ക്കു മുന്‍പ് ഒത്തുകളിക്കുന്നതിന് പണം വാഗ്ദാനം ചെയ്ത് വാതുവയ്പു സംഘാംഗം തന്നെ സമീപിച്ചതായി ഷാക്കിബ് അടുത്തിടെ വെളിപ്പെടുത്തിയിരുന്നു. എന്നാല്‍, ഈ വിവരം അപ്പോള്‍ത്തന്നെ ഐസിസിയുടെ അഴിമതിവിരുദ്ധ വിഭാഗത്തെ അറിയിക്കാത്തതാണ് കാരണമെന്നും റിപ്പോര്‍ട്ടില്‍ പറയുന്നു. ഇതിന്റെ പേരില്‍ ഷാക്കിബിന് ഒന്നര വര്‍ഷം വരെ വിലക്ക് ലഭിക്കാനും സാധ്യതയുണ്ടെന്നാണ് ബംഗ്ലദേശ് മാധ്യമങ്ങള്‍ റിപ്പോര്‍ട്ട് ചെയ്യുന്നത്.

ഇന്ത്യയ്ക്കെതിരായ ട്വന്റി20 പരമ്പരയ്ക്കായി ബംഗ്ലദേശ് ക്രിക്കറ്റ് ബോര്‍ഡ് പ്രഖ്യാപിച്ച 15 അംഗ ടീമില്‍നിന്ന് പുറത്താകുന്ന മൂന്നാമത്തെ താരമാണ് ക്യാപ്റ്റന്‍ കൂടിയായ ഷാക്കിബ് അല്‍ ഹസ്സന്‍. ടീമിന്റെ ഓപ്പണര്‍ കൂടിയായ തമിം ഇക്ബാലാണ് ആദ്യം തന്നെ പരമ്പരയില്‍നിന്ന് പിന്‍മാറിയത്. 'വ്യക്തിപരമായ കാരണങ്ങള്‍' ചൂണ്ടിക്കാട്ടിയാണ് തമിം പരമ്പരയില്‍നിന്ന് പിന്‍വലിഞ്ഞത്. ഇതിനു പിന്നാലെ പേസ് ബോളര്‍ മുഹമ്മദ് സയ്ഫുദ്ദീനും പരുക്കുമൂലം ടീമില്‍നിന്ന് ഒഴിവായി. ഷാക്കിബ് കൂടി പിന്‍മാറുന്ന സാഹചര്യത്തിലാണ് പുതിയ ടീമിനെ പ്രഖ്യാപിക്കുമെന്ന ബംഗ്ലാദേശ് ക്രിക്കറ്റ് ബോര്‍ഡിന്റെ പ്രഖ്യാപനം.

അതേസമയം, കളിക്കാരുടെ സമരത്തിന് നേതൃത്വം കൊടുത്തതിന്റെ പേരില്‍ ഷാക്കിബും ബംഗ്ലദേശ് ക്രിക്കറ്റ് ബോര്‍ഡും തമ്മില്‍ അത്ര സ്വരച്ചേര്‍ച്ചയിലല്ലെന്നും ചൂണ്ടിക്കാണിക്കപ്പെടുന്നു. ഇതിനു പിന്നാലെ ബംഗ്ലദേശിലെ ടെലകോം വമ്പന്‍മാരായ 'ഗ്രാമീണ്‍ഫോണി'ന്റെ ബ്രാന്‍ഡ് അംബാസഡറായി ഷാക്കിബ് കരാര്‍ ഒപ്പിട്ടതും ബോര്‍ഡിനെ ചൊടിപ്പിച്ചിട്ടുണ്ട്. ഇത് കരാര്‍ ലംഘനമാണെന്ന് ചൂണ്ടിക്കാട്ടി ബോര്‍ഡ് ഷാക്കിബിന് കാരണംകാണിക്കല്‍ നോട്ടിസും അയച്ചു. ബോര്‍ഡുമായുള്ള ബന്ധത്തിലെ വിള്ളലുകള്‍ കൂടിവരുന്നതിനിടെയാണ് പരമ്പരയില്‍നിന്നു തന്നെ ഷാക്കിബ് പിന്‍മാറുന്നുവെന്ന റിപ്പോര്‍ട്ട്.