ദേവ്ധര് ട്രോഫി മല്സരത്തില് ഉനദ്കടിന്റെ റണ്ണൗട്ട് വൈറല്
ഇന്ത്യ എ ടീമിന്റെ താരമായ ജയ്ദേവ് ഉനദ്കടിനു ദേവ്ധര് ട്രോഫിയില് ബാറ്റിങ്ങിനിടെ പിണഞ്ഞ അബദ്ധം സമൂഹമാധ്യമങ്ങളില് വൈറല്. ഇന്ത്യ ബിയും ഇന്ത്യ എയും തമ്മില് നടന്ന മത്സരത്തിനിടെ ഉനദ്കട് റണ്ണൗട്ടായ രീതിയാണ് ആരാധകര്ക്ക് കൗതുകമായത്. പന്ത് പ്രതിരോധിച്ച ശേഷം ക്രീസിനു പുറത്തായിരുന്ന താരം പിച്ച് പരിധോധിക്കുന്നതിന്റെ 'തിരക്കില്' ക്രീസില് ബാറ്റു കുത്താന് മറന്നതാണ് ഉനദ്കടിനു വിനയായത്. ദേശീയ ടീമില് പോലും കളിച്ചിട്ടുള്ള ഉനദ്കടിന്റെ പിഴവ് 'അവിശ്വസനീയം' എന്നാണ് ആരാധകരുടെ പക്ഷം.
നിശ്ചിത 50 ഓവറില് 302 റണ്സാണെടുത്ത ഇന്ത്യ-ബിയ്ക്കെതിരെ ഇന്ത്യ-എയുടെ മറുപടി ബാറ്റിങ്ങിനിടെ 43-ാം ഓവറിലാണ് സംഭവം. അടുത്തിടെ രാജ്യാന്തര ക്രിക്കറ്റില് അരങ്ങേറ്റം കുറിച്ച ഷഹബാസ് നദീമായിരുന്നു ബോളര്. താരതമ്യേന ഉയര്ന്ന വിജയലക്ഷ്യത്തിനു മുന്നില് പതറിയ ഇന്ത്യ-എ ഏഴു വിക്കറ്റ് നഷ്ടത്തില് 176 റണ്സെന്ന നിലയില് നില്ക്കെയാണ് ഉനദ്കടിന്റെ അശ്രദ്ധയും അലംഭാവവും അവര്ക്ക് വിനയായത്.
ക്രീസില്നിന്ന് കുറച്ചധികം മുന്നോട്ടുകയറി 43-ാം ഓവറിലെ അഞ്ചാം പന്ത് പ്രതിരോധിച്ച ഉനദ്കടിന്റെ കാല് ചെറുതായൊന്നു തെന്നി. തിരികെ ക്രീസിലേക്ക് തിരിച്ചെത്താന് ശ്രമിക്കുന്നതിനു പകരം അവിടെത്തന്നെ നിന്ന് പിച്ചിന്റെ പ്രശ്നം പരിശോധിക്കാനായിരുന്നു ഉനദ്കടിന്റെ 'തീരുമാനം'. പിച്ച് പരിശോധനയ്ക്കു ശേഷം മന്ദഗതിയില് ക്രീസിലേക്കു തിരിച്ചെത്തുമ്പോഴേയ്ക്കും ഉനദ്കട് ഔട്ട്. താരം അശ്രദ്ധയോടെ നില്ക്കുന്നതുകണ്ട് ഇന്ത്യന് താരം കൂടിയായ കേദാര് ജാദവ് പന്ത് ഉടനടി വിക്കറ്റ് കീപ്പര് പാര്ഥിവ് പട്ടേലിന് എറിഞ്ഞുനല്കുകയായിരുന്നു. പാര്ഥിവ് ഉടന് സ്റ്റംപിളക്കുകയും ചെയ്തു. ഇതോടെ എട്ടിന് 176 റണ്സെന്ന നിലയില് തകര്ന്ന ഇന്ത്യ എ, 194 റണ്സിന് എല്ലാവരും പുറത്തായി. മത്സരം തോറ്റത് 108 റണ്സിന്!
https://www.facebook.com/Malayalivartha