ലോകത്ത് കോവിഡ് വ്യാപനം വര്‍ധിക്കുന്ന സാഹചര്യത്തില്‍ ഈ വര്‍ഷം നടക്കേണ്ട ടി 20 ലോകകപ്പ് മത്സരങ്ങള്‍ മാറ്റി വച്ചു. ഇതോടെ ഐ.പി.എല്‍ മത്സരങ്ങള്‍ ഈ കാലളവില്‍ സംഘടിപ്പിക്കാനുള്ള തയ്യാറെടുപ്പിലാണ് ബി.സി.സി.ഐ. ഈ വര്‍ഷം ഒക്ടോബറില്‍ ഓസ്‌ട്രേലിയിലാണ് ലോകകപ്പ് മത്സരങ്ങള്‍ നടക്കാനിരുന്നത്. ഇതാണ് ഇപ്പോള്‍ അടുത്ത വര്‍ഷം ഒക്ടോബറിലേക്ക് മാറ്റിയിരിക്കുന്നത്. ഇന്ത്യയില്‍ കോവിഡ് വ്യാപനം വര്‍ധിക്കുന്ന സാഹചര്യത്തില്‍ യു.എ.ഇയില്‍ ടൂര്‍ണമെന്റ് സംഘടിപ്പിക്കാനുള്ള ശ്രമത്തിലാണ് ബിസിസിഐ.

ടി-20 ലോകകപ്പ് മാറ്റിവയ്ക്കുമെന്ന കാര്യത്തില്‍ ഏകദേശം തീരുമാനമായിരുന്നെങ്കിലും ഇന്നലെയാണ് ഐ.സി.സിയുടെ ഭാഗത്ത് നിന്ന് ഇക്കാര്യത്തില്‍ ഔദ്യോഗിക സ്ഥിരീകരണം ഉണ്ടായത്. ഇതോടെ പ്രഖ്യാപനത്തിന് കാത്തിരുന്ന ബിസിസിഐ വൈകാതെ തന്നെ ഐ.പി.എല്‍ നടത്തുന്നതിനുള്ള വഴികള്‍ തെളിച്ചു തുടങ്ങി എന്ന് പറയാം. രണ്ടാഴ്ചയ്ക്കുള്ളില്‍ സര്‍ക്കാര്‍ അനുമതി തേടുമെന്ന് ഐപിഎല്‍ ഗവേണിങ് കൗണ്‍സില്‍ ചെയര്‍മാന്‍ ബ്രിജേഷ് പട്ടേല്‍ പറഞ്ഞു. ഇന്ത്യന്‍ പ്രീമിയര്‍ ലീഗ് സംഘടിപ്പിക്കുന്നതിന് യു.എ.ഇ നേരത്തെ തന്നെ സന്നദ്ധത അറിയിച്ചിരുന്നു. 2014ല്‍ ടൂര്‍ണമെന്റിന്റെ ആദ്യ പാദം അവിടെയാണ് നടത്തിയത്. യു.എ.ഇയിലെ സാഹചര്യങ്ങളെക്കുറിച്ചും സാധ്യതകളെക്കുറിച്ചും നമുക്ക് നല്ല അറിവുണ്ട്,' അദ്ദേഹം കൂട്ടിച്ചേര്‍ത്തു. വരും ദിവസങ്ങളില്‍ തന്നെ ഐപിഎല്‍ ഗവേണിങ് ബോഡി ചേര്‍ന്ന് ഭാവി പരിപാടികള്‍ ആസൂത്രണം ചെയ്യുമെന്നും ബ്രിജേഷ് പട്ടേല്‍ വ്യക്തമാക്കി.

സെപ്റ്റംബര്‍ അവസാന വാരത്തോടെ ആരംഭിക്കുന്ന തരത്തില്‍ ടൂര്‍ണമെന്റ് സംഘടിപ്പിക്കാനാണ് സംഘാടകര്‍ ശ്രമിക്കുന്നത്. മാര്‍ച്ച് 29ന് ആരംഭിക്കേണ്ടിയിരുന്ന ഐ.പി.എല്‍ കോവിഡ് വ്യാപനത്തെ തുടര്‍ന്ന് നീട്ടിവയ്ക്കുകയും പിന്നീട് അറിയിപ്പുണ്ടാകുന്നത് വരെ ബി.സി.സി.ഐ റദ്ദാക്കുകയുമായിരുന്നു. അതേസമയം ഡിസംബര്‍ വരെ ആഭ്യന്തര ക്രിക്കറ്റ് നടക്കില്ലെന്ന് ബി.സി.സി.ഐ അപെക്‌സ് കൗണ്‍സിലിനെ അറിയിച്ചിരുന്നു. രാജ്യത്തുടനീളം നടക്കുന്ന വിവിധ ആഭ്യന്തര ടൂര്‍ണമെന്റുകളിലും ഏജ് ഗ്രൂപ്പ് മത്സരങ്ങളിലുമായി 38 ടീമുകളാണ് പങ്കെടുക്കേണ്ടത്. കളിക്കാരുടെ യാത്ര ഒരു വലിയ ഘടകമായതിനാല്‍ ഇക്കാര്യത്തില്‍ പെട്ടന്ന് തീരുമാനമെടുക്കാന്‍ ബുദ്ധിമുട്ടുണ്ടെന്നും ബോര്‍ഡ് വ്യക്തമാക്കി. ദുലീപ് ട്രോഫി, ദിയോധര്‍ ട്രോഫി, ചലഞ്ചേഴ്‌സ് സീരീസ് തുടങ്ങിയ ടൂര്‍ണമെന്റുകള്‍ റദ്ദാക്കും.

ഓസ്‌ട്രേലിയയില്‍ വീണ്ടും കോവിഡ് വ്യാപനമുണ്ടായ സാഹചര്യത്തിലാണ് ടി20 ലോകകപ്പ് മാറ്റിവയ്ക്കാന്‍ ഐ.സി.സി തീരുമാനിച്ചത്. ഒക്ടോബര്‍ 18 മുതല്‍ നവംബര്‍ 15 വരെ ഓസ്‌ട്രേലിയയില്‍ നടക്കേണ്ടതായിരുന്നു മത്സരങ്ങള്‍. എന്നാല്‍ വിക്ടോറിയ സംസ്ഥാനത്ത്‌കോവിഡ് കേസുകളുടെ രണ്ടാം കുതിച്ചുചാട്ടമുണ്ടായപ്പോള്‍ മെയ് മാസത്തില്‍ തന്നെ ആതിഥേയത്വം വഹിക്കാനുള്ള ബുദ്ധിമുട്ട് ഓസ്‌ട്രേലിയ ക്രിക്കറ്റ് ബോര്‍ഡ് പ്രകടിപ്പിച്ചിരുന്നു. ലോകകപ്പ് മാറ്റി വയ്ക്കുകയാണെങ്കില്‍ ഐ.പി.എല്‍ നടത്തുമെന്ന് നേരത്തെ ബി.സി.സി.ഐ അധ്യക്ഷന്‍ സൗരവ് ഗാംഗുലി വ്യക്തമാക്കിയിരുന്നു. നിലവില്‍ കോവിഡ് സാഹചര്യത്തിലും ഇംഗ്ലണ്ട്-വെസ്റ്റിസ് ടെസ്റ്റ് പരമ്പര പുരോഗമിക്കുകയാണ്. കോവിഡ് മാനദണ്ഡള്‍ കര്‍ശനമായി പാലിച്ച് കാണികള്‍ക്ക് സ്റ്റേഡിയത്തിലേക്ക് പ്രവേശനം നല്‍കാതെയാണ് മത്സരങ്ങള്‍ നടക്കുന്നത്.