കൊവിഡ് കാലത്തെ ഐപിഎല്ലിനെതിരെ ആന്‍ഡ്രൂ ടൈ രംഗത്തെത്തി; ജനങ്ങള്‍ക്ക് ചികിത്സപോലും ലഭിക്കുന്നില്ല, പിന്നെ എങ്ങനെയാണ് ഐപിഎല്ലില്‍ കോടികള്‍ വാരിയെറിയുന്നെന്ന് ഓസീസ് താരം
ഇന്ത്യയിലെ സാധാരണക്കാരായ ജനങ്ങള്‍ക്ക് ആശുപത്രികളില്‍ ചികിത്സപോലും ലഭ്യമല്ലാത്ത അവസരത്തില്‍ എങ്ങനെയാണ് കമ്പനികളും ഫ്രാഞ്ചൈസികളും ഐപില്ലിനായി കോടികള്‍ ചെലവഴിക്കുന്നുവെന്ന് ചോദിച്ച് ഓസ്‌ട്രേലിയന്‍ ക്രിക്കറ്റ് താരം ആന്‍ഡ്രൂ ടൈ.
രാജസ്ഥാന്‍ റോയല്‍സിന്റെ കളിക്കാരനായ ടൈ കഴിഞ്ഞ ദിവസം ഐപിഎല്‍ മതിയാക്കി നാട്ടിലേക്ക് മടങ്ങിയിരുന്നു. കൊവിഡ് 19 സാഹചര്യം മോശമായി വരുന്നതിനാലാണ് ടൈ മടങ്ങിയത്.
ക്രിക്കറ്റോ മറ്റു കായിക വിനോദങ്ങളോ നടക്കുന്നതില്‍ ടൈ എതിരല്ല. ജനങ്ങളെ മാനസിക സമ്മര്‍ദ്ദത്തില്‍ നിന്നും അകറ്റാന്‍ കായിക വിനോദങ്ങള്‍ക്ക് കഴിയുമെങ്കില്‍ അത് നടത്തുക തന്നെ വേണം.
എന്നാല്‍, എല്ലാവരുടേയും ചിന്ത ആ രീതിയിലല്ല. നമ്മള്‍ എല്ലാ വിഭാഗം ആളുകളുടെ അഭിപ്രായങ്ങളേയും ഒരേ രീതിയില്‍ മാനിക്കണമെന്നും ടൈ വിശദീകരിക്കുന്നു.
ഇന്ത്യയിലെ ഇപ്പോഴത്തെ സാഹചര്യമാണ് തന്നെ ഓസ്‌ട്രേലിയയിലേക്ക് മടങ്ങാന്‍ പ്രേരിപ്പിച്ചതെന്ന് താരം പറയുന്നുണ്ട്. ഒന്നിലധികം കാരണങ്ങളാലാണ് താന്‍ ഇന്ത്യയില്‍നിന്നും മടങ്ങിയത്. അതില്‍ പ്രധാനപ്പെട്ടത് കൊവിഡ് ദുരിതം വര്‍ധിക്കുന്നു എന്നതു തന്നെ.
പെര്‍ത്തില്‍ കടുത്ത നിയന്ത്രണങ്ങള്‍ വരുമെന്ന സൂചനയും ലഭിച്ചു. ഇന്ത്യയില്‍ നിന്നും മടങ്ങി വരുന്നവരെ നിയന്ത്രിക്കാന്‍ സര്‍ക്കാര്‍ ആലോചിക്കുന്ന വേളയിലാണ് മടക്കമെന്നും ടൈ പറയുകയുണ്ടായി.
അഞ്ചു കളിക്കാരാണ് ഇതുവരെ ഐപിഎല്‍ മധ്യത്തില്‍ വെച്ച് നാട്ടിലേക്ക് മടങ്ങിയത്. നാല് വിദേശ കളിക്കാരും ഒരു ഇന്ത്യന്‍ താരവും. ഡല്‍ഹി താരം ആര്‍ അശ്വിനാണ് ഐപിഎല്‍ സീസണില്‍ നിന്നും പിന്മാറിയ ഇന്ത്യന്‍ കളിക്കാരന്‍.
രാജസ്ഥാന്‍ റോയല്‍സിന്റെ ആന്‍ഡ്രൂ ടൈ, ലിയാം ലിവിങ്‌സ്‌റ്റോണ്‍ എന്നിവരും ബാംഗ്ലൂര്‍ റോയല്‍ ചാലഞ്ചേഴ്‌സിന്റെ കെയ്ന്‍ റിച്ചാര്‍ഡ്‌സണ്‍, ആദം സാംപ എന്നിവരും ഐപിഎല്‍ ഈ സീസണ്‍ മതിയാക്കി മടങ്ങിയവരാണ്.
https://www.facebook.com/Malayalivartha
