ഒറ്റ ഫ്രീകിക്ക് കൊണ്ട് റഷ്യന് ലോകകപ്പിന്റെ താരമായ ജര്മനിയുടെ ടോണി ക്രൂസ്
ടോണി ക്രൂസ് ഒറ്റ രാത്രികൊണ്ടു മെഗാതാരമായി. സ്വീഡനെതിരെ സമനില വാങ്ങി ലോകകപ്പില്നിന്നു തന്നെ പുറത്താകുമെന്ന ഘട്ടത്തില് ജര്മനിയെ വിജയത്തിലേക്കു തിരികെക്കൊണ്ടുവന്ന ക്രൂസ് മിസൈലില്, താരം ജര്മന്കാരുടെ വീരപുത്രനായി.ലോകമെമ്പാടുമുള്ള ഫുട്ബോള് പ്രേമികളെ അവിശ്വസനീയതയുടെ വലയിലേക്കു തള്ളിയിട്ട വിജയഗോള്. മ്യൂനിക്കിലും ജര്മനിലെ മറ്റു നഗരങ്ങളിലും രാത്രി തുടങ്ങിയ ആഘോഷം പുലരുംവരെ നീണ്ടു.
മിഷേല് ബല്ലാക്ക്, ബാസ്റ്റിന് ൈഷ്വന്സ്റ്റീഗര് എന്നിവര്ക്കുശേഷം ജര്മന് ഫുട്ബോള് ടീമിന്റെ മധ്യനിരയിലേക്കു വന്ന പ്രതിഭാശാലിയാണ് ഇരുപത്തെട്ടുകാരന് ക്രൂസ്. പതിനേഴാം വയസ്സില് ജര്മന് ക്ലബ് ബയണ് മ്യൂനിക്കിന്റെ ഒന്നാം ടീമിലെത്തിയ ക്രൂസ്, അവിടെനിന്ന് വായ്പക്കരാറില് ബയേര് ലെവര്കൂസനിലേക്കും 2014 ലോകകപ്പിനു പിന്നാലെ സ്പാനിഷ് ക്ലബ് റയല് മഡ്രിഡിലേക്കും പോയി.
നാലു യുവേഫ ചാംപ്യന്സ് ലീഗ് കിരീടങ്ങള് നേടിയ ഏക ജര്മന് കളിക്കാരന് എന്ന ബഹുമതിയും ക്രൂസിനൊപ്പമുണ്ട്. മുന്നിലും പിന്നിലും നാലുവശങ്ങളിലും കണ്ണുള്ള കളിക്കാരനെന്നാണ് ക്രൂസിനെ ഒറ്റവാക്കില് വിശേഷിപ്പിക്കാം.
പാസ് നല്കുന്നതിലെ കൃത്യതയും കളിക്കളത്തിലെ വ്യക്തമായ കാഴ്ചയും ധാരണയും ജര്മനി ചാംപ്യന്മാരായ 2014-ലോകകപ്പില് തന്നെ ക്രൂസിനെ ശ്രദ്ധേയനാക്കിയിരുന്നു. ഹോളണ്ട് ഇതിഹാസതാരം യൊഹാന് ക്രൈഫ്, മധ്യനിരയിലെ പെര്ഫെക്ട് കളിക്കാരന് എന്ന വിശേഷണമാണ് ക്രൂസിനു നല്കിയത്. ഇതേത്തുടര്ന്നായിരുന്നു, രണ്ടുകോടി പൗണ്ടിന്റെ കരാറെഴുതി റയല് മഡ്രിഡ് ക്രൂസിനെ സ്പെയിനിലേക്കു കൊണ്ടുപോയത്.
മധ്യനിരയില് ഏതു പൊസിഷനിലും കളിക്കാന് കഴിയുമെന്നതാണ് ക്രൂസിന്റെ സവിശേഷത. ജര്മനിയുടെ ലോകകപ്പിലെ തുടര്ന്നുള്ള കളികളിലും ഫ്രീകിക്ക് വിദഗ്ധനായ ക്രൂസിന്റെ പ്രകടനം നിര്ണായകമാവും.
https://www.facebook.com/Malayalivartha