വ്യാജ സാമ്പത്തിക കേസുകള് ഫയല് ചെയ്ത് പണം തട്ടാന് ശ്രമിച്ച വിദേശികള് പിടിയില്
കുവൈത്തില് പൗരന്മാരുടെയും പ്രവാസികളുടെയും ഒപ്പുകള് ദുരുപയോഗം ചെയ്ത് കോടതികളില് വ്യാജ സാമ്പത്തിക കേസുകള് ഫയല് ചെയ്ത് പണം തട്ടാന് ശ്രമിച്ച വിദേശ ക്രിമിനല് സംഘം പിടിയില്. കുവൈത്ത് ആഭ്യന്തര മന്ത്രാലയത്തിന്റെ ക്രിമിനല് ഇന്വെസ്റ്റിഗേഷന് ജനറല് ഡിപ്പാര്ട്ട്മെന്റിലെ സാമ്പത്തിക കുറ്റാന്വേഷണ വിഭാഗമാണ് ക്രിമിനല് സംഘത്തെ പിടികൂടിയത്.ഒരു പൗരന് നല്കിയ പരാതിയിലാണ് അന്വേഷണം ആരംഭിച്ചത്. തനിക്ക് പരാതിക്കാരനുമായി യാതൊരു സാമ്പത്തിക ഇടപാടോ പരിചയമോ ഇല്ലാതിരുന്നിട്ടും തനിക്കെതിരെ പണം നല്കാന് കോടതി വിധി വന്നതായി പരാതിയില് വ്യക്തമാക്കിയിരുന്നു.
അന്വേഷണത്തില് പ്രധാന പ്രതി മുന്പ് ജോലി ചെയ്തിരുന്ന വാഹന വാടക കമ്പനിയിലെ അനുഭവം ഉപയോഗപ്പെടുത്തി വാടക നടപടികളുടെ ഭാഗമാണെന്ന് പറഞ്ഞ് പൗരന്മാരുടെയും പ്രവാസികളുടെയും ഒഴിഞ്ഞ പ്രോമിസറി നോട്ടുകളിലും രേഖകളിലും ഒപ്പുകള് വാങ്ങിയതായി കണ്ടെത്തി. പിന്നീട് ഈ രേഖകള് കൈവശം സൂക്ഷിച്ച ശേഷം രാജ്യം വിട്ട പ്രതി അവ ഉപയോഗിച്ച് വ്യാജ സാമ്പത്തിക അവകാശവാദങ്ങള് തയ്യാറാക്കി കോടതികളില് സമര്പ്പിക്കുകയായിരുന്നു.
പ്രധാന പ്രതിയുടെ സഹോദരിയാണ് വ്യാജ രേഖകള് കോടതിയില് സമര്പ്പിക്കുകയും കേസുകള് ഫയല് ചെയ്യുകയും കോടതി വിധിക്ക് ശേഷം പണം കൈപ്പറ്റുകയും ചെയ്തിരുന്നത്. ഇവരെ അറസ്റ്റ് ചെയ്തപ്പോള് നിരവധി പ്രോമിസറി നോട്ടുകള്, വ്യാജ രേഖകള്, പ്രാദേശിക ബാങ്കുകളുടെ രസീതുകള് എന്നിവ കണ്ടെടുത്തതായി ആഭ്യന്തര മന്ത്രാലയം അറിയിച്ചു.അന്വേഷണത്തില് ഇതേ രീതിയില് 130ലധികം സാമ്പത്തിക കേസുകള് സംഘം കോടതികളില് ഫയല് ചെയ്തതായി വ്യക്തമായി.
ഒഴിഞ്ഞ പ്രോമിസറി നോട്ടുകളിലോ വിവരങ്ങള് പൂര്ണമല്ലാത്ത രേഖകളിലോ ഒരിക്കലും ഒപ്പിടരുതെന്നും, ആവശ്യമായ എല്ലാ വിവരങ്ങളും പൂരിപ്പിച്ച ശേഷമേ രേഖകളില് ഒപ്പിടാവൂ എന്നും ആഭ്യന്തര മന്ത്രാലയം പൗരന്മാര്ക്കും പ്രവാസികള്ക്കും മുന്നറിയിപ്പ് നല്കി. ഇത്തരത്തിലുള്ള തട്ടിപ്പുകളില് നിന്ന് സ്വയം സംരക്ഷിക്കാന് പരമാവധി ജാഗ്രത പാലിക്കണമെന്നും മന്ത്രാലയം അഭ്യര്ഥിച്ചു.
https://www.facebook.com/Malayalivartha
