ആവേശകരമായ ഫൈനലില്‍ പാകിസ്താനെ കീഴടക്കി ജൂനിയര്‍ ഹോക്കി ഏഷ്യ കപ്പ് നിലനിര്‍ത്തി ഇന്ത്യ.. സലാലയിലെ സുല്‍ത്താന്‍ ഖാബൂസ് യൂത്ത് ആന്‍ഡ് കള്‍ചറല്‍ കോംപ്ലക്‌സില്‍ നടന്ന കലാശക്കളിയില്‍ പാകിസ്താനെ 2-1ന് മറികടന്നാണ് ഇന്ത്യ കിരീടം നിലനിര്‍ത്തിയത്.

അംഗദ് ബിര്‍ സിങ്, ഹുണ്ടാല്‍ എന്നിവരാണ് ഇന്ത്യക്കുവേണ്ടി ഗോള്‍ നേടിയത്. ഫൈനലിന്റെ എല്ലാ ആവേശവും നിറഞ്ഞുനിന്ന മത്സരത്തില്‍ കൊണ്ടും കൊടുത്തുമാണ് ഇരു ടീമുകളും ആദ്യ മിനിറ്റുകളില്‍ മുന്നേറിയത്.

ഇതിനിടെ ആക്രമണം ശക്തമാക്കിയ ഇന്ത്യ 13ാം മിനിറ്റില്‍ അംഗദ് ബിര്‍ സിങ്ങിലൂടെ മുന്നിലെത്തി. ഇതോടെ പാകിസ്താന്‍ ഉണര്‍ന്നു കളിച്ചെങ്കിലും ലക്ഷ്യം കാണാനായില്ല. ഏഴു മിനിറ്റിനുശേഷം രണ്ടാമതും വലകുലുക്കി ഇന്ത്യ മത്സരത്തില്‍ പിടിമുറുക്കി. ഹുണ്ടാലിന്റെ വകയായിരുന്നു ഗോള്‍.

എന്നാല്‍, രണ്ടാം പകുതിയില്‍ മൂര്‍ച്ചയുള്ള ആക്രമണവുമായി കളംനിറഞ്ഞുകളിക്കുന്ന പാകിസ്താനെയാണ് കണ്ടത്. 38ാം മിനിറ്റില്‍ അലി ബഷാരതിന്റെ ഗോളിലൂടെ മത്സരത്തില്‍ പതിയെ ആധിപത്യമുറപ്പിച്ചു. സമനിലക്കായി പാക് താരങ്ങള്‍ അവസാന നിമിഷംവരെ കിണഞ്ഞുശ്രമിച്ചെങ്കിലും ഗോള്‍മാത്രം നേടാനായില്ല. മത്സരം കാണാന്‍ മലയാളികളടക്കമുള്ള നിരവധി പ്രവാസി ഇന്ത്യക്കാര്‍ എത്തിയിട്ടുണ്ടായിരുന്നു.