സ്വര്ണത്തിലേക്ക് പെണ്സംഘം തുഴയെറിഞ്ഞതോടെ റോവിങ്ങില് കേരളത്തിന് മെഡല്
സ്വര്ണത്തിലേക്ക് പെണ്സംഘം തുഴയെറിഞ്ഞതോടെ റോവിങ്ങില് കേരളത്തിന് മെഡല് . തുഴച്ചിലില് അഞ്ച് ഫൈനലുകള് നടന്ന ബുധനാഴ്ച രണ്ടിനങ്ങളില് സ്വര്ണം സ്വന്തമാക്കിയ കേരളം ഒരിനത്തില് വെങ്കലവും നേടി. വനിതകളുടെ കെ- ഫോര്, പെയര് ഇനങ്ങളിലാണ് സ്വര്ണം. ഡബ്ള് സ്കളിലാണ് വെങ്കലം.
റോസ് മരിയ ജോഷി, വി.ജെ. അരുന്ധതി, പി.ബി. അശ്വതി, വി.എസ്. മീനാക്ഷി എന്നിവരടങ്ങിയ സംഘമാണ് കെ ഫോറില് സ്വര്ണം തുഴഞ്ഞെടുത്തത്(ആറ് മിനിറ്റ് 45.3 സെക്കന്ഡ്).
കഴിഞ്ഞ ഗെയിംസിനും ഇതേ ഇനത്തില് കേരളം സ്വര്ണം സ്വന്തമാക്കിയിട്ടുണ്ടായിരുന്നു. വനിതകളുടെ പെയര് വിഭാഗത്തില് അലീന ആന്റോ, ബി. വിജിനാമോള് എന്നിവരും സ്വര്ണത്തീരത്തണഞ്ഞു(ഏഴ് മിനിറ്റ് 13.9 സെക്കന്ഡ്). വനിതകളുടെ ഡബ്ള് സ്കള് വിഭാഗത്തില് വി.പി. അശ്വനി കുമാരനും ഡി. ദേവപ്രിയയും അടങ്ങിയ ടീമിനാണ് ഓളപ്പരപ്പിലെ വെങ്കലനേട്ടം(ഏഴ് മിനിറ്റ് 11.3 സെക്കന്ഡ്).
https://www.facebook.com/Malayalivartha