ഹോക്കിതാരം ഒളിമ്പ്യന്‍ പി ആര്‍ ശ്രീജേഷ് സംസ്ഥാന സ്‌കൂള്‍ കായിക മേളയുടെ ബ്രാന്‍ഡ് അംബാസഡറാകും...
ഹോക്കിതാരം ഒളിമ്പ്യന്‍ പി ആര്‍ ശ്രീജേഷ് സംസ്ഥാന സ്‌കൂള്‍ കായിക മേളയുടെ ബ്രാന്‍ഡ് അംബാസഡറാകും. നവംബര്‍ നാലിന് കൊച്ചിയില്‍ ആരംഭിക്കുന്ന മേളയുടെ സാംസ്‌കാരിക പരിപാടി നടന്‍ മമ്മൂട്ടി ഉദ്ഘാടനം ചെയ്യുമെന്ന് വിദ്യാഭ്യാസമന്ത്രി വി ശിവന്‍കുട്ടി.
നേരത്തേ നിശ്ചയിച്ചതില്‍ നിന്ന് വ്യത്യസ്തമായി മേളയുടെ ഉദ്ഘാടനം മഹാരാജാസ് കോളേജ് മൈതാനത്ത് നടത്തും. 11ന് വൈകിട്ട് സമാപന സമ്മേളനത്തില്‍ മുഖ്യമന്ത്രി പിണറായി വിജയന്‍ ട്രോഫി സമ്മാനിക്കുന്നതാണ്. കൂടുതല്‍ പോയിന്റ് നേടുന്ന ജില്ലയ്ക്കായുള്ള മുഖ്യമന്ത്രിയുടെ മെഡല്‍ അദ്ദേഹം വിദ്യാഭ്യാസ വകുപ്പിന് കൈമാറിയതായും കടവന്ത്ര ഇന്‍ഡോര്‍ സ്റ്റേഡിയത്തില്‍ മാധ്യമപ്രതിനിധികളുടെ യോഗത്തില്‍ മന്ത്രി അറിയിച്ചു.
ഒളിമ്പിക്സ് മാതൃകയിലുള്ള ഉദ്ഘാടനച്ചടങ്ങുകള്‍ക്ക് കലൂര്‍ ജവഹര്‍ലാല്‍ നെഹ്റു സ്റ്റേഡിയമാണ് വേദിയായി നിശ്ചയിച്ചിരുന്നത്. ഇവിടെ ഐഎസ്എല്‍ ഫുട്ബോളിനുള്ള ടര്‍ഫ് മറ്റാവശ്യത്തിന് ഉപയോഗിക്കുന്നതിലുള്ള തടസ്സംമൂലമാണ് വേദി മാറ്റിയത്.
മൂവായിരം കുട്ടികള്‍ പങ്കെടുക്കുന്ന ഡിസ്പ്ലേ ഉള്‍പ്പെടെ രണ്ടുമണിക്കൂര്‍ നീളുന്നതാണ് ഉദ്ഘാടനച്ചടങ്ങ്. കാസര്‍കോട്, തിരുവനന്തപുരം എന്നിവിടങ്ങളില്‍നിന്ന് വിളംബരജാഥകള്‍ നവംബര്‍ മൂന്നിന് വൈകിട്ട് കൊച്ചിയിലെത്തും.
സ്‌കൂള്‍ കായികമേളയ്ക്കൊപ്പം ഭിന്നശേഷിക്കാരായ രണ്ടായിരം കുട്ടികള്‍ പങ്കെടുക്കുന്ന ഭിന്നശേഷി കായികമേള ചരിത്രത്തിലാദ്യമായി നടക്കും.
https://www.facebook.com/Malayalivartha
