സൗത്ത് അമേരിക്കന്‍ ലോകകപ്പ് യോഗ്യതാ മത്സരത്തില്‍ ബ്രസീലിനെ സമനിലയില്‍ കുരുക്കി വെനസ്വേല... വിനീഷ്യസ് ജൂനിയറും റഫീഞ്ഞ്യയുമെല്ലാം കളത്തിലിറങ്ങിയിട്ടും ബ്രസീലീന് വിജയഗോള്‍ നേടാന്‍ കഴിഞ്ഞില്ല.

43-ാം മിനിറ്റില്‍ റഫീഞ്ഞ്യയിലൂടെ ബ്രസീല്‍ മുന്നിലെത്തി. മാസ്മരിക ഫ്രീ കിക്കിലൂടെയാണ് റഫീഞ്ഞ്യ ഗോള്‍ നേടിയത്. എന്നാല്‍ മുന്നിലെത്തിയതിന്റെ സന്തോഷം അധികനേരം നീണ്ടുനിന്നില്ല.

മൂന്ന് മിനിറ്റ് കഴിഞ്ഞ് രണ്ടാം പകുതിയുടെ തുടക്കത്തില്‍ 46-ാം മിനിറ്റില്‍ ടെലാസ്‌കോ സെഗോവിയയിലൂടെ വെനസ്വേല സമനില പിടിച്ചു. തുടര്‍ന്ന് വിജയഗോളിനായി ബ്രസീല്‍ തീവ്രശ്രമം നടത്തിയെങ്കിലും ഗോള്‍ അകന്നുനിന്നു. 67-ാം മിനിറ്റില്‍ ബ്രസീലിന് ലീഡ് ഉയര്‍ത്താനായി പെനാല്‍റ്റിയുടെ രൂപത്തില്‍ അവസരം ലഭിച്ചെങ്കിലും വിനീഷ്യസ് പാഴാക്കുകയായിരുന്നു.