ഏഷ്യന്‍ വനിത ചാമ്പ്യന്‍സ് ട്രോഫി ഹോക്കിയില്‍ നിലവിലെ ചാമ്പ്യന്മാരായ ഇന്ത്യയും ഒളിമ്പിക്‌സ് വെള്ളി മെഡല്‍ ജേതാക്കളായ ചൈനയും ഫൈനലില്‍ പ്രവേശിച്ചു.

സെമി ഫൈനലില്‍ ഇന്ത്യ 2-0ത്തിന് ജപ്പാനെയും ചൈന 3-1ന് മലേഷ്യയെയും തോല്‍പിച്ചു. ജപ്പാനെതിരെ നാലാം ക്വാര്‍ട്ടറിലാണ് ആതിഥേയരുടെ രണ്ട് ഗോളുകളും പിറന്നത്. 13 പെനാല്‍റ്റി കോര്‍ണറുകളടക്കം ഇന്ത്യക്ക് നിരവധി സുവര്‍ണാവസരങ്ങള്‍ ലഭിച്ചിരുന്നു.

48ാം മിനിറ്റിലെ പെനാല്‍റ്റി സ്‌ട്രോക്ക് നവ്‌നീത് കൗര്‍ ഗോളാക്കി. 56ല്‍ ലലാറംസിയാമിയും സ്‌കോര്‍ ചെയ്തു. റൗണ്ട് റോബിന്‍ ലീഗിലെ അഞ്ച് മത്സരങ്ങളും ജയിച്ച് സെമിയിലെത്തിയ ഇന്ത്യ അപരാജിത യാത്ര തുടരുകയാണ്. മൂന്നാംസ്ഥാനത്തിനായി ജപ്പാനെ മലേഷ്യ നേരിടുന്നതാണ്.