കഴിഞ്ഞ മാസം ദോഹ ഡയമണ്ട് ലീഗില്‍ 90 മീറ്റര്‍ മാര്‍ക്കെന്ന സ്വപ്ന ദൗത്യം പൂര്‍ത്തിയാക്കിയ ഇന്ത്യയുടെ ജാവലിന്‍ ത്രോ സൂപ്പര്‍ താരം നീരജ് ചോപ്ര മറ്റൊരു അങ്കത്തിന്.

പാരിസ് ഡയമണ്ട് ലീഗ് പുരുഷ ജാവലിന്‍ ത്രോ മത്സരം ഇന്ന് നടക്കും. ദോഹോയില്‍ 90.23 മീറ്റര്‍ എറിഞ്ഞ് നീരജ് സ്വര്‍ണമുറപ്പിച്ച് നില്‍ക്കെയാണ് ജര്‍മനിയുടെ ജൂലിയന്‍ വെബര്‍ ഞെട്ടിക്കുന്ന പ്രകടനം പുറത്തെടുത്തത്. വെബര്‍ 91.06 മീറ്ററിലെത്തിയതോടെ നീരജ് വെള്ളിയിലൊതുങ്ങി.ഇന്നു മത്സരിക്കുന്ന എട്ട് താരങ്ങളില്‍ വെബറുമുണ്ട്.

ആന്‍ഡേഴ്‌സണ്‍ പീറ്റേഴ്‌സ് (ഗ്രാനഡ), കെഷോണ്‍ വാല്‍ക്കോട്ട് (ട്രിനിഡാഡ് ആന്‍ഡ് ടൊബാഗോ), ജൂലിയസ് യെഗോ (കെനിയ), ആന്‍ഡ്രിയന്‍ മര്‍ദാരെ (മള്‍ഡോവ), ലൂയിസ് മൗറീഷ്യോ ഡ സില്‍വ (ബ്രസീല്‍), റെമി റൗഗെറ്റെറ്റ് (ഫ്രാന്‍സ്) എന്നിവരാണ് മറ്റുള്ളവര്‍.നീരജും വെബറുമടക്കം കൂട്ടത്തില്‍ അഞ്ചുപേരും 90 മീറ്റര്‍ കടന്നവരാണ്. 2017ന് ശേഷം ആദ്യമായാണ് നീരജ് പാരിസ് ഡയമണ്ട് ലീഗില്‍ മത്സരിക്കുന്നത്.

അന്ന് അഞ്ചാം സ്ഥാനമായിരുന്നു. ഒളിമ്പിക്‌സ് ഒരുക്കം കാരണം കഴിഞ്ഞ വര്‍ഷം പങ്കെടുത്തില്ല.