ചെക് റിപ്പബ്ലിക്കില്‍ നടന്ന ലോക അത്ലറ്റിക്സ് കോണ്ടിനെന്റല്‍ മീറ്റില്‍ ഒന്നാമനായതില്‍ സന്തോഷമുണ്ടെങ്കിലും ത്രോയില്‍ സംതൃപ്തിയില്ലെന്ന് ഇന്ത്യയുടെ ജാവലിന്‍ താരം നീരജ് ചോപ്ര പറയുന്നു. ചൊവ്വാഴ്ച രാത്രി ഒസ്ട്രാവയില്‍ നടന്ന മത്സരത്തില്‍ 85.29 മീറ്റര്‍ എറിഞ്ഞാണ് നീരജ് ചാമ്പ്യനായത്.


മേയ്മാസം ദോഹയില്‍ ഡയമണ്ട് ലീഗ് മത്സരത്തിനിടെ 90.23 മീറ്റര്‍ എറിഞ്ഞ് കരിയറിലെ ഏറ്റവും മികച്ച ദൂരവും ദേശീയ റെക്കോഡും കണ്ടെത്തിയിരുന്നു. മൂന്നാം ത്രോയിലാണ് 85.29 മീറ്റര്‍ വന്നത്. 83.45, 82.17, 81.01 എന്നിങ്ങനെയായിരുന്നു മറ്റു ത്രോകള്‍. രണ്ട് ഏറുകള്‍ ഫൗളായി.

മികച്ച പ്രകടനത്തെക്കാള്‍ അഞ്ചുമീറ്ററോളം കുറവാണ് ചൊവ്വാഴ്ചത്തെ ത്രോ എന്നതിനാലാണ് പ്രകടനത്തില്‍ സംതൃപ്തിയില്ലെന്ന് നീരജ് പ്രതികരിച്ചത്. കുറെക്കൂടി മെച്ചപ്പെട്ട പ്രകടനം നടത്താനായി ആഗ്രഹിച്ചിരുന്നെന്നും നീരജ് .

അതേസമയം ജൂലായ് അഞ്ചിന് ബെംഗളൂരുവില്‍ നടക്കുന്ന നീരജ് ചോപ്ര ക്ലാസിക്കാണ് അടുത്തമത്സരം.