ഇംഗ്ലണ്ട് വനിതകള്‍ക്കെതിരായ ആദ്യ ഏകദിനത്തില്‍ ഇന്ത്യന്‍ വനിതകള്‍ക്ക് 259 റണ്‍സ് വിജയലക്ഷ്യമാണുള്ളത്്. ടോസ് നേടി ബാറ്റിംഗിനെത്തിയ ഇംഗ്ലണ്ടിനെ സോഫി ഡങ്ക്ലി (83), ആലിസ് ഡേവിഡ്സണ്‍ റിച്ചാര്‍ഡ്സ് (53) എന്നിവരാണ് മികച്ച സ്‌കോറിലേക്ക് നയിച്ചത്.

നതാലി സ്‌കിവര്‍ ബ്രന്റ് 41 റണ്‍സ് നേടി. ഇന്ത്യക്ക് വേണ്ടി ക്രാന്തി ഗൗത്, സ്നേഹ് റാണ എന്നിവര്‍ രണ്ട് വിക്കറ്റെടുക്കുകയും ചെയ്തു. മോശം തുടക്കമായിരുന്നു ഇംഗ്ലണ്ടിന്. സ്‌കോര്‍ബോര്‍ഡില്‍ 20 റണ്‍സുള്ളപ്പോള്‍ താമി ബ്യൂമോണ്ട് (5), ആമി ജോണ്‍സ് (1) എന്നിവരുടെ വിക്കറ്റുകള്‍ ഇംഗ്ലണ്ടിന് നഷ്ടമായി.

തുടര്‍ന്ന് എമ്മാ ലാംപ് (39) സ്‌കിവര്‍ സഖ്യം 71 റണ്‍സ് കൂട്ടിചേര്‍ക്കുകയുണ്ടായി. എന്നാല്‍ ഇരുവരേയും പുറത്താക്കി സ്നേഹ് റാണ ഇന്ത്യയെ മത്സരത്തിലേക്ക് തിരിച്ചുകൊണ്ടുവന്നു. തുടര്‍ന്ന് റിച്ചാര്‍ഡ്സ് - സോഫിയ സഖ്യം 106 റണ്‍സ് ചേര്‍ത്തു. ഇതാണ് ഇംഗ്ലണ്ടിനെ തകര്‍ച്ചയില്‍ നിന്ന് രക്ഷിച്ചു. ആലീസ് പുറത്തായെങ്കിലും സോഫി എക്ലെസ്റ്റോണിനെ (23) കൂട്ടുപിടിച്ച് ഡങ്ക്ലി ഇംഗ്ലണ്ടിനെ 250 കടത്തി. മൂന്ന് മത്സരങ്ങളാണ് പരമ്പരയിലുള്ളത്. നേരത്തെ അഞ്ച് മത്സരങ്ങളുടെ ടി20 പരമ്പര 3-2ന് ഇന്ത്യ സ്വന്തമാക്കിയിരുന്നു.