ഇരട്ട പദവിയുമായി ബന്ധപ്പെട്ട് മുന്‍ ക്രിക്കറ്റ് താരങ്ങളായ സച്ചിന്‍ തെന്‍ഡുല്‍ക്കറിനും വി.വി.എസ് ലക്ഷ്മണിനും ബിസിസിഐ നോട്ടീസ് അയച്ചു. ഇന്ത്യന്‍ ക്രിക്കറ്റ് ഉപദേശക സമിതി അംഗങ്ങളായ സച്ചിനും ലക്ഷ്മണും ഐപിഎല്‍ ടീമുകളുടെ മെന്റര്‍മാരായി സേവനം ചെയ്യുന്നതു ചോദ്യം ചെയ്താണ് നോട്ടീസ് അയച്ചിരിക്കുന്നത്. സച്ചിന്‍ മുംബൈ ഇന്ത്യന്‍സിന്റെയും ലക്ഷ്മണ്‍ സണ്‍റൈസേഴ്‌സ് ഹൈദരബാദിന്റെയും മെന്റര്‍മാരാണ്. ബിസിസിഐ ഓംബുഡ്‌സ്മാനാണ് ഇരുവര്‍ക്കും നോട്ടീസ് അയച്ചത്.

എന്നാല്‍ സച്ചിന് മുംബൈ ഇന്ത്യന്‍സുമായി ഔദ്യോഗിക കരാറുകളൊന്നും ഇല്ലെന്നും ഫ്രാഞ്ചസിയില്‍നിന്നും പണം പറ്റുന്നില്ലെന്നും പറയുന്നു. ക്രിക്കറ്റ് ഉപദേശക സമിതിയിലെ പ്രവര്‍ത്തനത്തിനും അദ്ദേഹം പ്രതിഫലം വാങ്ങുന്നില്ല.
മധ്യപ്രദേശ് ക്രിക്കറ്റ് അസോസിയേഷന്‍ അംഗം സഞ്ജീവ് ഗുപ്തയാണ് ഇതുമായി ബന്ധപ്പെട്ട് പരാതി നല്‍കിയത്.